Supisyente na an produksyon han ihawon nga baktin ha syudad han Borongan, matapos an halaba nga panahon nga pag depender ha taga gawas nga mga “supplier” han karnehon nga baktin.
Usa ine han mga nadiskobre ha ginbuhat nga pag-aram nga iginbuyagyag an resulta dida hin usa nga karukayakan o “coordination meeting” kakulop, Lunes, Pebrero 14, 2022, han mga hindadabihan nga opisyales han siyudad.
Sering ni City Agriculturist Macario Gabornes, Jr., an “Dukwag Agrikultura” nga programa ni Borongan City Mayor Jose Ivan Dayan Agda in nakabulig ha paka-abot han “swine sufficiency” o an pagkamay-ada han siyudad sakto nga kadamoon han kinahanglanon nga irihawon nga baktin tikang pa han bulan han Nobyembre 2021.
“Pira na ka-dekada, an Borongan in “totally dependent” han “external supply” o supply nga tikang ha iba nga lugar labi na ha may Mindanao nga dapit, pero dara han programa nga “Dukwag Agrikultura,” naging supisyente an supply hine nga karne ha at lokalidad,” pahayag ni Gabornes.
Tungod hine, napamatud-an nga akos ngay-an mag supply an siyudad han kalugaringon nga produksyon han baboy, durante han pagsarang han African Swine Fever han tuig 2020, nga nagin hinungdan han pagsiradohi han kanan syudad “borders” ngan waray na pinasulod nga sarakyan nga may karga nga mga baboy agud malikayan an pagsasarang han sakit han baktin ha iba pa.
Apisar hine, nagin usa nga pitad han goberno syudad agud matagan solusyon an namimintana nga pag-hingulang han karne nga baktin, pinahuram hin puhunan nga salapi in pira nga benepisyaryo han “Dukwag Agrikuktura” nga programa, ilarum han Production Investment for Growing Swine (PIGS) project.
Hine nga PIGS, pinapahuram hin puhunan an gumurudti nga parauma basta la kwalipikado hiton proyekto.
Gin-aghat hine nga proyekto an mga “pig farmers” nga mag padamo pa han ira produksyon han baboy pinaagi han mga “local backyard pig farmers” sugad man an mayda dagko nga umhanan.
Dugang pa ni Gabornes, nga tinikangan han paglugaring han siyudad pagpadamo han baktin, waray pa natabo nga sinisiring nga “Pork Holiday” o an pag-undang hiton pag-ihaw hin baktin ha merkado dara na han programa ni Mayor Agda.
“Bisan kun waray na nasupply tikang ha gawas, waray kita abat nga nagkamayda “Pork Holiday” o an pag-udung han pag ihaw ha merkado,” pahayag ni Gabornes.
“Pinaagi han programa ni Mayor Dayan, ngan han pagbulig han at mga parauma, nakab-ot ta ine nga milestone,” dugang pa ni Gabornes.
Base ha datos hiton City Agriculture Office, maabot hin 111 nga “hog raisers” an aada hiton “Dukwag Agrikultura Program” dida han pinakaka bag-o nga datos yana nga Enero 2022.
Kun pagsusumahun, maabot na hin 320 an kadamoon han “hog raisers” an siyudad upod na an wara pa pagpa-membro han programa.
#DukwagAgrikultura
