06 September 2020, Sunday – Gin-buhat in usa nga Grand Pulong-Pulong Cum Dul-ong Serbisyo Caravan nga may-ada thema nga “Pagkaurusa para hit Pag-asenso han mga Boronganon”, nga gin-dumara ha Pinanag-an, panalugon nga barangay han siyudad han Borongan.
Pinangunahan an nasabi nga pulong-pulong ni City Mayor Jose Ivan Dayan C. Agda kaupod an mga pili nga empleyado ngan department heads han LGU-Borongan sugadman an magkaiba-iba nga ahensiya han siyudad.
“Ini nga aton gin-buhat yana, programa ini hiton City Government of Borongan paghatag hin eksakto nga serbisyo ha mga tawo nga dad-on iton goberno ha syudad nganhi ha ka-barangayan, nga iton goberno mamati hit araba hit katawhan diri la nga hibabaru kami pagpapasinganhi hin mag-eeleksyon ngan tiaru hit iyo sagrado nga butos kundi it sistema la nga pang gobernohan nga makatawo, makatadungan nga pinamumunuan hiton Philippine Army, hiton aton Philippine National Police ngan Local Government Units,” mensahe ni Mayor Agda.
Sumala pa ha iya, panuyo han pagbisita ha Barangay Pinanag-an kaupod na an Barangay Baras nga batiun an ira mga ungara, mga giha han yadi ha goberno nga waray pagkakasusuba. Sugadman tagan hin solusyon ngan kabatunan an mga problema nga ginpresentar han barangay pinaagi han ira pagpadangat han ira mga issue ug problema ngadi ha 78IB Infantry (Warrior) Battalion kun diin isinumat naman ngadi ha City Government han Borongan.
Labot la han programa nga ginbuhat, nagkamay-ada daman hin mass wedding han mga magtiayon nga waray mahinayon makasal han ikaduha nga batch didi ha siyudad. Sugadman, libre nga arot ngan pan-turi ha mga kabataan.
Nagkamay-ada pa medical mission sugad han pan-ngehu ug konsultasyon ha mga may-ada sakit pangunguna nira Dr. Daisy Sacmar, Dr. Patricia Bernadette Apita, Dr. Bernadette Galacan, RHU doctors han siyudad.
Nagkamay-ada pa panhatag hin foodpacks ha mga residente kada pamilya antis magkagikan an grupo ni Mayor Agda ka tuo pa niya, asya nala anay an pamatrunan nga hatag basi diri na anay magkinalakat pagpakadi ha siyudad kay limitado man an pwede tumambong ha tipadaraon nga patron han siyudad ha Borongan ngan urog na labi an paghirot ha pagbubugiok ha katitirok nga waray maalapyatan hini nga COVID-19 nga sakit.
Hi Mayor Agda in gin-updan han nasabi nga programa ni LtCol Jay C. Pascua, Ex-O, 78IB, 81D, PA han 78IB Infantry (Warrior) Battalion nga sumala pa kan Jojito Acla, Executive Assistant IV han City Mayors Office, mismo ini nga opisyal an nagpa abot han ka-kinahanglan han pulong-pulong nga matabo ha Pinanag-an nga dapit, kay amo an ungara han mulopyo didto.
#BoronganonDisiplinadoAko
