Gindumara an groundbreaking ceremony para han pag-tigdong hin four-storey school building, yana nga adlaw, Agosto 4, ha Sabang Central Elementary School nga yana in tatawagon na nga Sabang Integrated School.
Sumala kan Ma. Nelly de los Santos, Principal I han Sabang Central School, dara kay naaprubahan na ini nga proyekto ha Regional Office, dida han Pebrero 24, 2022, yana nga tuig in mamayda na Grade 7 ha Sabang Integrated School.
Usa han mga rason kun kay ano igin-duso ini nga pagpatigdong han Sabang Integrated School in para makabulig ha mga estudyante nga diri na gumastos hin dako hit pagpasahe pagkakadto ha iskuylahan nga harayo ha ira mga panimalay.
“Dako an naging bulig ni Mayor Jose Ivan Dayan Agda nga maging posible ini nga amon request. Giuupaye ko it suporta nga iya iginhahatag ha amon,” yakan ni Delos Santos.
An igtitigdong nga iskuylahan in pinaka-una nga four-storey school building ngan Integrated School ha bug-os nga Borongan City Division.
Siring pa ni Dr. Gorgonio G. Diaz Jr., Schools Division Superintendent, DepEd Borongan City Division, dako it pasasalamat hit bug-os nga City Division kan Mayor Agda han paghatag hin top priority hini nga project. Dara hini nga bulig, nakapag-allocate hin pondo para hit mga magturutdo hit Sabang Integrated School.
“Dako it mahibubulig hit DepEd pag mold hit moral values hit mga kabataan. Unta diri niyo hingalimtan it pagtutdo ha mga estudyante it pagiging hospitable kay asya iton it nakaka-attract hit aton mga turista,” yakan ni City Mayor Agda.
Nagpatapod naman hi Mayor Agda nga an LGU Borongan in mahatag hin suporta hit pagpatigdong han four-storey building para damo pa nga estudyante an maka-iskuyla.
Ginsisiguro han DepEd Borongan City Division, pinaagi han bulig hit LGU Borongan, nga mag-aabre na an Sabang Integrated School yana nga Agusto 2022, ngan maghahatag hin dekalidad nga edukasyon ngadto han mga estudyante.
