Nagdumara hin Ceremonial Awarding para han duha (2) nga benepisyaryo han Rural Enterprise Development Project on Livestock and Poultry o RED Project han Dukwag Agrikultura program yana nga adlaw, March 11, 2022.
An proyekto in ilarum han City Veterinary Office ha pangunguna ni City Veterinarian Dr. John Adrian Ang, kaupod han iba nga empleyado han City Vet, ngan ni Rupert Ambil, representante han Mayor’s office.
Usa han mga benepesyaryo hine nga programa in hi Atty. Bryan Lassiter, taga Barangay Bato, kon diin sobra 1 milyon pesos an nahuram para han pagpahilawig han ira poultry farm.
Sumala kan Jasmine Lassiter, asawa ni Atty. Lassiter nga representate han nasabi nga seremonyas, nagtikang hira han pagtigdong han ira farm han tu-ig 2018 pa, ha Barangay Locso-on nga naabot hin tulo (3) ka ektarya an kahalu-ag.
Dugang pa Mrs. Lassiter, gagamiton nira nga mag-asawa an nasabi nga pinahuram nga puhunan hiton pagpadamo pa han ira kamanukan nga na-prodyus hin bonay (eggs).
Samtang, hi Fidel V. Anacta III, nga may-ada naman piggery farm ha Barangay Cabong, in nakahuram hin puhunan nga isakto 893,423.25 pesos, para naman han iya pagtikang han iya Ready to Lay o RTL Chicken ha iya farm.
Siring niya, tikang han nagkamay-ada African Swine Fever (ASF) han rehiyon, nalimitahan na an ira pagpadako hin baktin, salit, ira nahunahunaan nga magtikang hin poultry farm.
Mahinunumduman nga an opisina han City Veterinary an napasilitar han mga dagko nga mga farmers nga karuyag maging benepisyaryo han Dukwag Agrikultura.
Ginlala-uman han duduha nga benepisyaryo nga makapag-prodyus hira hin mga bonay nga ma-isusuply ha merkado, nga kon diin ini an usa han mga katuyu-anan han nasabi nga programa.
Para han mga interesado han pag-apply han Dukwag Agrikultura program, pwede bisitahon an City Veterinary Office, nga nahimumutang ha Brgy. Pepelitan, ngan an City Agriculturist Office nga makikit-an naman ha ground floor, han Borongan City Hall.