Namimintana na liwat an pagbalikan han kamanduan nga mang-gamit otro an kada panimalay hin ‘”Quarantine Pass” (QP) kun magawas para hin mga importante nga katoyoanan.
Sumala ini han ginkauroyonan han mga kapitanes han mga barangay tikang ha Poblacion o “City Proper”, ha ira miting ha di pala maiha nga panahon, nga pinangunahan han Chairman han Public Health and City Task Force (PHSTF), Atty. Romeo Alexis Devora.
Manunumdoman nga an PHSTF, in gin-tukod ni City Mayor Jose Ivan Dayan Agda, abir dayon mapapanginanohan an mga isyo may kalabutan han kanan syodad pag-surapo han COVID-19.
Mismo nga nagpahayag an mga kapitanes nga an paggamit han QP, in usa nga epektibo nga pitad nga nakaka iban han pag-kikinagawas han nga tawo.
Dugang pa nira, nga kun damo it nagkikinalakat nga tawo ha kalsada, posibli dida pagdadamo it nakakapyotan hit kagaw.
Ha di pala maiha, gin klasipikar han Provincial Health Office of Eastern Samar an Borongan nga may-ada na “Community Transmission” ngan kaupod hin tulo nga bungto han probinsya han Eastern Samar, in nakada ha “High Risk Category”, tungod ini hin tigda la nga pagdamo hin nag positibo han COVID-19.
Kundi ini mandaw nga klasipikasyon, sumala hin matatapuran nga surok, in madagmit la nga nagbabag-o.
Tungod han nagkaka-urosa nga boses han mga kapitanes han Goberno Siyudad, nga matagan proteksyon iton katawhan, ngan diri gud magkalyap hin haluag pa ini nga makaharadlok nga kagaw, dako it posibilidad, nga manggamit otro hin QP it mga tawo kun hira in tigarawas ha ira panimalay.
#BoronganonDisiplinadoAko
