Gintikangan yana nga adlaw han City Government han Borongan an paghatag ayuda ngadto han mga benepisyaryo han kanan DOLE Program for Education, kun tawagon Special Program for Employment of Students (SPES.)
Sumala kan Rodito Capito, Senior Administrative Assistant III han Barangay Affairs Office, kasugbong han nasabi nga programa han DOLE an LGU Borongan kun diin maamot an goberno siyudad han 60% han kabug-usan nga isusuhol ha mga SPES benefeciaries, ngan 40% naman in ighahatag ngan makukuha ha DOLE.
Kada usa nga estudyante nga makakatagamtam han programa in makakarawat hin P256.58 kada adlaw sakop hin 20 diyas nga pagtrabaho ha kada tagsa nira nga barangay, pinaagi han ira pagbulig han pag mantiner han kalinisan. Nagtikang ka epektibo an programa tikang pa han bulan han Septembre 2020.
Sumala pa kan Capito, una anay nga makakarawat han mga SPES an kanan LGU Borongan kontribusyon nga 60% han ira kabug-usan nga makakarawat nga hiagi.
Pulong pa niya, nag-alutaga an City Government han Borongan hin maabot P1,132,000.00 para mapondohan ini nga programa, sumala han nakapatik dida han Appropriation Ordinance No. 30, S. of 2020.
Dako naman an pagpasalamat ni Shiela Mae Rado, han Barangay Songco, nga usa hiya nga nakakarawat hini nga programa, pulong pa niya, “Ihahatag ko in kan nanay kay makuri padaman yana it panuroy hit kwarta, yana nga panahon sugad haam nga ti-eskoyla pala, wara pa trabaho dako in nga bulig, makakapanguha ak hin requirements,” sering han estudyante nga hi Shiela.
Sumala naman kan Leslie Celaya, residente han Barangay Campesao, “Makakapalit kami hin kunsumo hit amon pagkaon, salamat ha DOLE ngan LGU Borongan.”
Una nga nag pay-out yana nga adlaw an barangay Campesao, Songco, ngan Hindang ug nakatalaan naman sumunod an iba nga barangay han syudad ha mga tipadaraon nga adlaw ug semana.
Tungod ini kay diri man pwede pagdudrunganon an pagdistribwir, ha paglikay han pag-bubugiok han tawo agud masunod an mga health protocols ngan malikyan an makaharadlok ngan nakakamatay nga COVID-19. #
#BoronganonDisiplinadoAko
