Ipinanawagan yana nga adlaw, an pagkaurusa ha butnga han goberno ug CPP-NPA ha ginbuhat nga pagtigaman han makarima-dima nga pag-ambusa hin usa nga sarakyan hin mga sibilyan ha Barangay Libuton nga dapit, kun diin namatay in upat ka tawo ug nasamaran in 13 nga iba pa.
Pinaagi hin usa nga tarpaulin, ipinahayag ha mga NPA an mensahe nga nag-ko-kondena han ira diri tinawo nga binuhatan, tungod han ira panmusila hin mga inosente nga sibilyan.
Dida han mensahe ni City Administrator, Atty. Celestino Cabato, komo tinaglawas ni Mayor Jose Ivan Dayan C. Agda, iya gin-sosnan adto nga panhitabo, may usa na ka tuig an linabay, dungan an iya hingyap nga unta magkaurosa na, kay mas maupay iton usa nga lugar nga waray ginkakahadlokan it mga tawo, ngan abir pa mapadayon an progreso han syodad.
Sugad man, an Hepe han Polisya han Siyudad, PLtCol Doughlas Antonio B. Eloja in nagpa angbit gihapon han iya mensahe hin pagka-urusa.
Kan Eloja pa gin-imbitar an mga kabugtoan ha bukid, nga magtubyan na han ira mga kalugaringon, kay didi ha lugwa nga sosyedad, makikita an ira tinood nga hingyap nga tambulig han goberno.
Kan Eloja pa ginsabi an Dukwag Agrikultura (DA) nga Programa ni Mayor Agda ngan han Goberno Siyudad nga may panuyo mabuligan an mga parag-uma, nga mag-umento an ira kutsitsa ha uma.
Sumala pa han Hepe han Polisya, ini nga DA in iginpasabot na ha mga kabaranggayan, para han mas halarom nga pakasabot han mga parag-uma.
Iginpatapod pa ni ni Eloja, ha katawhan han Borongan nga yana nga ka-Paskohan ira daw titingohaon magmamurayaw it siyudad hit Borongan, kabulig it ira kabugtuan ha pakigbisog, an kasundalohan han Phil. Army.
Kan Kapitan Jose Gavilan naman han Libuton ginhangyo an mga NPA hin pakig-iristorya pananglitan mayda hira mga hangyo, ngan unta daw diri na ini mautro nga pag-ambus kay kairo hit mga tawo; damo daw hadto an nag ebakwet tungod han kahadlok.
Sugad man, hi Kapitan Roger Dilao han Hindang in nagpabati gihapon han iya hingyap hin harampang para matagan solusyon, an mga arungot han mga rebelde nga kabugtoan ha bukid.
Presente han programa in pira nga mga empleyado han Goberno Siyudad, hi Sgt. Roger Abalos (INF) PA han 81st Civil Military Operations, kaupod in pira nga membro han Phil. Army.
Ha dugang pa nga paghinumdom han mga kinabuhi nga nahanaw tungod han binuhatan han mga NPA, gindagkotan in mga kandila ha ligid han kalsada harani nga dapit han lugar, lakip an halipotay nga pag-ampo nga pinangunahan ni City Information Officer, Cynthia Arceño.
Sinundan naman ini dayon hin usa nga misa ha Borongan Cathedral. #
#BoronganonDisiplinadoAko
