Gin-a-awhag han LGU Borongan an pag-ataman ngan pag-padamo hin ka-kandingan (goats) nga nagpo-produser han masustansiya nga gatas.
Han linabay pala nga adlaw, ginbisita ni City Veterinarian, Dr. John Adrian Ang, an Samar Island Cooperative (SAMICO) ha Catbalogan, Samar nga dapit, nga kilala nga nagpo-produser han masustansiya nga gatas tikang han espesyal nga kanding nga gintatawag nga Saanen.
An “goat farm” kun diin hikikit-an in maabot sobra 200 nga Saanen nga klase hin kanding, in nahimumutang ha bungto han Tarangnan, Catbalogan.
Ha ngaran han paniguro han Dukwag Agrikultura (DA) nga programa han City LGU, pinalit hi Dr. Ang hin usa ka bug-os nga lalaki nga Saanen, nga sadang pag-mamatan o pagtikangan han pagpadamo (herd build-up) han mga babayi nga Saanen, nga makukuhaan han marasa ug masustansiya nga gatas.
Dugang ni Dr. Ang, nga damu daw an mga babayi nga kanding ha Borongan, nga ma’mat han Anglo-Nubian, nga pwede ipadis han Saanen agud mag burod ngan mag-anak ine hin kadugangan nga mga kanding Saanen, nga ha kaurhian, makukuhaan hin gatas.
Nabaruan pa ni Dr. Ang, nga an SAMICO in hol-os nga ginta- tagan suporta han National Dairy Authority (NDA) nga nagpatapod gihapon maghatag han parehas nga suporta ha LGU Borongan kay ngani, gintikangan na in iristorya kasumpay hini nga proyekto ha butnga han mga opisyales han City LGU nga pinangunahan ni City Mayor Jose Ivan Dayan Agda ug NDA officials.
Dugang pa ni Dr. Ang, nga an “feeding program” han ira City Social Welfare and Development Office (CSWDO) ha Catbalogan in napalit han gatas han Saanen, labot han igin-de-deliver han SAMICO nga gatas ngadto han ira naghihimo hin Ice Cream ug iba pa nga produkto nga sinun-uran hin gatas.
Siring pa niya ginpa-tadihan daw ha iya grupo an mga “milk products” han “goat farm” sugad han presko nga gatas, an iba naman in “flavored” o timplado na ngan hin Keso, ug sering han batan-on nga VetDoc, “marasa gud man!”
Sumala pa ha iya, diri delikado o mapili han pagkaon ine nga Saanen nga klase hin kanding, kundi, mayda naman daw ngani naka andam na nga “Pasteur Area” ha Brgy. Camada nga dapit, kun diin gin-himo nga pa-nabsaban han Saanen “goats.”
An panabsaban ha Camada, in maiha na nga gin-tanuman han makaraon han kanding nga mga sighot sugad han Napier Grass, Mulberry, Ipil-ipil, Indigofera, Madre de Agda ug mani-mani.
Alicia Nicart, Borongan City Information Office
#DukwagAgrikultura
