Kasumpay han Elderly Week Celebration yana nga bulan han Oktubre 2022, an LGU-Borongan in nagdudumara hin Oplan Eye Check-up para han mga Senior Citizens ha syudad, ginbubuhat ha City Plaza. Ini in duha ka adlaw nga aktibidad, gintikangan yana nga adlaw, Oktubre 21, ngan mahuhuman buwas hit adlawoy, Oktubre 22.
Sumala kan Vergie Buna, FISCAB Association President, may-ada 1000 slots nga maihahatag ha mga kalagsan hine nga duha ka-adlaw, ini an libre nga check-up ha mata, prescripted eyeglasses ngan doble vista eyeglasses tikang ha espesyalista nga doktor.
Dugang pa niya dire mabaraka an dire maayawan han nasabi nga slots kay pinaniniguruhon hit City Government nga maubos an sobra 7000 nga kalagsan han Borongan City ha mga masunod nga aktibidad han mga Senior Citizens, ha pagkayana in limitado an doktor ngan oras.
Siring ni Dr. Katrina Carmel Velasco han RHU Sta. Fe ngan team leader han mga volunteers, in angay pasalamatan hi Dr. Rowena Agda, kapikas ha kinabuhe ni Mayor Jose Ivan Dayan Agda, pinaagi ha iya, hiya in nakipag-coordinate kan Dr. Catalino Jadoc, usa nga espesyalista ha mata, nga tikang pa ha Tacloban City ngan iya sangkay ug nagin classmate ha Medicine, nga diin nakabulig mahimugso an nasabi nga aktibidad. Tugon pa ha iya ni Dr. Agda nga magin manilampuson gud an Oplan Eye Check-up han mga kalagsan, bisan dire “indigent” o “may kaya” nga lagas nga kinahanglanon niya an eyeglasses in angay gud matagan hini nga mga serbisyo.
Dugang pa ni Dr. Velasco, an ihahatag na prescripted eyeglasses ngan doble vista eyeglasses in base han examination han team ni Dr. Jadoc.
Sumala naman kan Dr. Jadoc, an LGU-Borongan an sinagot han eyeglasses ngan hi Mayor Agda naman ngan mga officials an binayad han doble vista nga mga eyeglasses salit ira igintugon ha mga matatagan han doble vista eyeglasses in gamiton gud kay an iba nga natatagan in gintitimos la ngan diri ginagamit, kinahanglanon ini nira gamiton urog na labi an mayda na mga grado panhirayo masasayang la it gastos hit goberno.
Presente liwat hi Jojito Acla, City Cooperative and Development Office, representante ni Mayor Agda kun diin iya liwat ipinaabot an pasasalamat han medical teams han syudad ha pangunguna ni Dr. Velasco, han OSCA President ngan FISCAB Association ha pangunguna nira Zenaida Rapada ngan Vergie Buna ngan team nira Dr. Jadoc nga nag-organisar han nasabi nga aktibad.