Naki-usa an syudad han Borongan ha pagselebrar han 45th National Disability Rehabilitation & Prevention Week 2023 para han mga Persons with Disability (PWDs) nga gintikangan hin opening program yana nga adlaw, Hulyo 25, nga gindumara ha Doña Vicenta Hotel.
Ini in may-ada tema nga “Persons with Disabilities Accessibility and Rights: Towards a Sustainable Future where No One is Left Behind”.
Pinartisiparan an aktibidad han mga PWDs kaupod an ira mga kag-anak o sulod-balay nga nanginginano ha ira.
Naghatag hin mensahe ngan suporta kun mapatiunan-o makakabulig ha ira sektor hi Sangguniang Panlungsod Member Victor Franco, representante ni Mayor Jose Ivan Dayan Agda, Police Inspector. Gundelino Elona, Acting City Fire Marshall han BFP Borongan Station, Benjamin Panaguiton han DTI-Eastern Samar, Kristine Mae Estidola han DOLE-Eastern Samar ngan Cristopher Zamora han TESDA.
Iginpaangbit naman ni Jassie Acla, City Nutrition Action Officer han syudad, an mahiunong han “Power of First 100 Days” kun diin dako an bulig hini ha Disability Prevention kun magbuburod an usa nga babaye.
Sumala naman kan SPM Franco, usa hiya han mga nalilipay nga ha pagkayana mas napapanginano na an mga PWD’s ha national scale labi na ha Borongan, ngani gin-aalutagahan na hira hin pondo han gobyerno syudad sugad hin mga programa, livelihood training ngan mga aktibidad nga ‘adaptive’ para ha ira sector.
Mahinunumduman nga iginduduso nga mahipatuman na yana han mga opisyales han syudad ha pangunguna ni Mayor Agda ngan SPM Lyra Gel Limbauan, nga hiya an Chairman han Committee on Social Welfare and Development, an tipadaraon nga “monthly cash assistance” para ha mga eligible PWD’s. Labot pa hini, hira liwat in usa nga magiging benepesyaryo han Libre Sakay ha syudad.
Sumala naman kan Danielle Joy Ampong, Focal Person han PWD’s, parte han selebrasyon han NDRP Week, hit Hulyo 27, in malibot in team para hin Accessibility Audit ngadto han mga establisyemento ha syudad para kitaan kun nagsusugot na ba hira han Accessibility Law sugad han mga rampa nga ‘standard’.
Para naman han mayda mga talento nga mga PWD’s, magkakamay-ada naman hira paisan-isan nga pagbubuhaton hit Hulyo 28 ngan magkakamay-ada pa hin kalipayan nga sinusugad nga “Gala Night” ha Boro Bay Hotel.
Ginpasilitaran an nasabi nga aktibidad han Borongan City Social Welfare and Development Office ha pangunguna ni CSWDO officer Verina Amoyo.
