Gin-abrehan yana nga adlaw an Mobile Registration para han National ID System ha Borongan, pinaage han Philippine Statistics Authority (PSA) ha pangunguna han team ni Mr. Ronnie A. Bajado, Provincial Chief Statistical Specialist.
Una nga nagparehistro hira City Mayor Jose Ivan Dayan Agda, Vice-Mayor Emmanuel Tiu Sonco ngan Ma. Luisa M. Azul III, City Civil Registrar Officer, nga gindumara ha City Hall Ground.
Sumala kan Mayor Agda, “Makalilipay nga ha katapusan han maiha nga proseso, hiton ID System at least natikangan na an kanan dinhe ha syudad.”
Sering niya, iton goberno syudad hit Borongan in nagpa-palatay hin damo nga social services ug mga programa nga nag-agi hin aprubado nga ordinansa.
Dako daw gud it gamit hine nga ID nga igin papatuman hit PSA kay dinhe makikilala an tinood nga Boronganon ngan tungod kay Boronganon man, takos hiya kumarawat han bisan ano nga grasya, kalungganayan o programa han syudad.
“Una na dinhe it Dukwag Agrikultura, ikaduha an Social Pension ha mga katigurangan nga na edad hin 60 pa igbaw, and then it pagigin usa nga estudyante nga magkakamay-ada liwat programa an at City Government para ha ira, ngan hopefully yana nga ika-7 hit September, mahi-implement na an libre medisina, nga iton requirement an pagigin citizen hit aton syudad,” sering ni Mayor Agda.
“Hi kami naman nga mga elected official nga mag-iimplement hit mga programa in dire na kukurian hit paghimo hin mga programa ug serbisyo kay mayda na namon pag-babasehan nga mga datos, pinaagi na hini nga iyo mga ID, ngan dire na kami magpipinanlastiko hin mga “datos” nga ira makukuha hit mga taga PSA,” dugang pa ni Mayor Agda.
Pulong naman ni PSA Provincial Head, Bajado, “Kun may na kamo ID waray na duplication, ngan gamit liwat ine kun ma apply hin negosyo kay asya na an ipapakita ha “Ease of Doing Business” ngan amo nala ine nga usa nga ID an gagamiton ha mga transaksyon ha goberno man nga opisina o pribado.”
Dugang pa ni Bajado nga target mahe-rehistro ha Borongan in 11,670 ka tawo, ngan uunahon hine an mga barangay nga waray signal han internet kun diin ika-cluster hira ha pinakaharani nga barangay nga may-ada naman signal.
An mga molopyo han Barangay Canlaray an pinakauna nga barangay nga nagpailarom han 2nd Step Registration kay human naman hira han Step 1 Registration (Pre-Registration) nga ginbuhat han PSA ha mga barangay han nakalabay nga mga bulan. # (SB/YP)
#BoronganonDisiplinadoAko
#DukwagAgrikultura
