Gintagan hin rekognasyon an 13 nga Tricycle Drivers ngan 1 nga Utility Worker Personnel han Borongan City komo mga tangkod nga mga indibidwal ha syudad, ginbuhat ha Mayor’s Conference Room, yana nga aga, Enero 11.
An 14 nga natagan hin rekognasyon in nag-uli hin mga nahibayaan nga butang ngan igin-surrender ha Borongan City Transport Terminal (BCTT) nga pinamumunuan ni Napoleon Bebita, head han nasabi nga opisina ngan Officer In Charge han Traffic Operation and Management.
Ha iya mensahe, gintagusya ni Mayor Jose Ivan Dayan Agda an mga awardee.
“Ini nga iyo ipinakita nga character nga pagigin tangkod, usa in hiya nga ika-capitalize ta, nga iton tricycle drivers matatapuran ngan maasahan, asya it dida it gidadakui nga advertisement it pagigin tangkod, ha panahon yana dire na it damo it sugad hit pero at least dinhi ha Borongan somehow ipinakikita ta, hi kita it modelo hit ngatanan ngan very proud ak hit ha iyo”.
Kinarawat naman hira hin Certificate of Appreciation ngan gift packs tikang ha City Government pinaagi han BCTT.
Siring pa ni Mayor Agda, an naihatag nga pahalipay in diri gud dako kun kukwentahon, pero an importante dida in an ‘honor’ kaysa han kwarta.
An mga pinasidunggan nga 13 nga tricycle drivers in hira Mark Anthony Ando, Romeo Ausa, Marlon Ayawon, Melanio Bertos, Ramil Busa, Tito Caspe, Tito Catubay, Helmrih Gacu, Randy Hingpis, Alex Montes, Pablito Palada, Erwin Ramasta, Felicisimo Sabate.
Nag-uusaan naman nga BCTT Utiliy Personnel hi Emeliana Sabate.
Dugang pa ni Mayor Agda, plano liwat tagan hin fuel subsidy an mga tricycle drivers hit ti-arabot nga tuig 2025 para makabulig han ira gastos ha ira pagpakabuhi.
Presente liwat han pasidungog hi Joseph Capada, TODA Federation President han Borongan City.
#BoronganonDisiplinadoAko
