Ha pagigin tuptop han ira mga obligasyon nga pangunahan an pag-establisar han kamurayawan ha mga tay-aw nga lugar, ginbisita nira BGen Camilo Ligayo, an mismo Commander han 801 Brigade han Philippine Army, nga sakop han 8th Infantry Division, an tay-aw nga lugar han San Andres-lower han Borongan.
Inupdan pa han mismo Regional Director han kapulisan han Rehiyon-8, PBGen Ronaldo de Jesus, ug Borongan City Mayor Jose Ivan Dayan C. Agda, gin-aghat nira an mga molopyo han barangay nga igpabilin an mahimyang nga estado han demokrasya nga katilingban, agud mahipatuman an mga programa pangkauswagan.
Sumala han Assistant Director han National Intelligence Coordinating Agency (NICA), Joseph Garcid, dire angay totooron largo an mga igin pa-plastar nga mga impormasyon han mga dire matatapuran nga surok, kay an iba hine nga ira mga estorya in waray lain nga panuyo kundi an hibangon an mahimyang nga palakat han goberno, bisan pa an mga kinabuhi ug kabubwason han mga inosente nga kabatan-onan, nga masayon la makumbinsir hin pagbulig ha kagiusan nga pakipag-bisog, pinaagi hin mga presentasyon ug mga pasalida.
Dugang pa ni Garcid nga kun hadto an pakaintinde han tawo kun nabati han “intelligence” in sekreto nga impormasyon, yana iginpapasabot na ine, kay komo kabakyang ha pagmantinir han kamurayawan ha mga komunidad, abre na ha katawhan ano man nga mahinungdanon, napapanahon ug eksakto nga impormasyon nga maghahatag ha ira hin giya, ano man nga desisyon nga ira hihimoon ha ira mga panginabuhi.
Importante daw, dugang pa han opisyal, nga magin masilhag ha katawhan an pan-gobernohan, agud hira makasabot han sakto nga ira kahimtang upod pa an mga panhitabo ha ira paghagrani, kay pinaagi hine matutuman an tinood nga pagka-barakyang tipadto ha kamurayawan.
Iginsaysay naman ni Mayor Agda, nga an panuyo han ira pagbisita in abir ipaabat hin mas harani ha tawo, an kanan goberno serbisyo, ngan maintindihan nira nga myda klase hin goberno nga nag-uulingag, napaid ha mga kablas, ngan myda pag respeto ug kahadlok han Ginoo.
“Ine nga amon pagbisita ha iyo, para ha ak in dako nga grasya han Ginoo, nga tungod hit nga EO-70, nag reresulta ine hin pag lusad namon nga tinapuran nga opisyal hit goberno, nganhi han sugad nga mga tay-aw nga lugar, agud ipaabat namon ha iyo, an sinserad han kanan goberno katuyoanan nga kauswagan ug prosperidad. Unta, ipadangat daman niyo ha aton mga kabugtoan nga aadto pa ha luyo nga pang gobernohan, nga bumalik, makig-urosa na ha aton ha piod han balaud basi umorsa na kita ngatanan,” pulong ni Mayor Agda.
Ginbuhat an Serbisyo-Caravan Retooled Community Support Program (RCSP) kaupod ni Ms. Marjorie Jaranilla, representante ni Sen. Bong Go,
Lord Byron Torrecarion, OCD08, RD, Erlinda Olivia Tiu han PIA ug iba pa.
Nagkamayda pa panhatag hin foodpacks kada pamilya tikang han opisina ni Sen. Bong Go ngan mga uyasan para han kabataan nga inupadan pa hin pa raffle hin duha nga bisekleta ngan tablet.
Naghatag naman hin snacks an grupo han PIA ngan paniudto nga pagkaon naman iginhatag han PCSO ngan grupo ni Sen. Bong Go.
Sobra naman an kalipay han napili han DSWD pinaagi kan Alice Biazon, nga 65 ka tawo nga nakarawat kada usa hin tag P3,000.00 nga ayoda.
An grupo naman nira Dr. Bernadette Galacan, Dr. Daisy Sacmar, Dr. Ann Ocfemia in naghatag ha mga molopyo han San Andres hin serbisyo medical ngan dental. #
#BoronganonDisiplinadoAko
