Nangarawat utro, ha di pala maiha, an mga senior citizens han siyudad, han ayuda ha ira pinansyal nga P1,500.00, gumikan han kaban han Goberno Siyudad han Borongan.
Sumala kan Ms. Imari Plana, Admin. Officer V han City Treasurer’s Office, ha panuyo han talahuron nga Mayor Jose Ivan Dayan C. Agda, nga magin talwas an katigurangan kontra han COVID-19 ug hin iba pa nga kataragman, ira daw iginbalay-balay an pan-duhol han kwarta ngadto han kada tigurang nga kwalipikado ngan listado.
Dugang pa ni Plana, nga adto nga P1,500.00 in daw na representar han kada bulan nga allowance nga P250.00 han kada tigurang, tikang han bulan han Hulyo ngada han bulan han Disyembre 2020.
Sumala pa ha iya diri daw paprehas an nakakarawat han kada tigurang kay depende daw ini kun ano nga bulan nahi-rehistro an usa ka tawo ha Office of the Senior Citizens Association (OSCA).
Ini nga binulan nga ayuda nga tag-P250.00 in maiha na nga hingyap nga bulig para han katigurangan han Amay han Siyudad, Mayor Agda, ug iya ikinalipay nga natuman ini nga hingyap, pinaagi han paniguro ug pagduso han batan-on nga magbabalaud, Hon. Lyra Gel Agda Limbauan
, nga hul-os naman ginsuportaran han kabug-usan nga konseho agud ini in magin hul-os nga balaud, nga yana gin ngangaranan, Monetary Allowance Local Ordinance No. 172, Series of 2020.
Pira naman nga senior citizen in nagpahayag han ira sinsero nga pasalamat kanda Mayor Agda ug Konsehala Limbauan ngan han kabug-osan nga Sangguniang Panlungsod ng Borongan , lakip na hi Vice Mayor Emman Tiu Sonco tungod han ira pagka arabuyon nga matagan hinabang an mga senior citizens han siyudad. #
#BoronganonDisiplinadoAko
