Daog an pipira nga mga Boronganon dida han ginbuhat nga 8th Fiesta Fishing Tournament Competition, Shore Casting Open, ha Rawis, Brgy. Alang-alang, Setyembre 10.
An kompetisyon in tinambongan hin mga partisipantes tikang ha iba iba nga parte han Eastern Visayas nga kun diin in may duduha nga kategorya; Champion hi Jojie Najie han Borongan dida han Biggest Catch Category samtang hi John Balagwis naman an Champion han Most Catch Category.
Ha kadugangan, 1st runner up naman hi Allan Loste han Borongan dida han Biggest Catch Category samtang 2nd runner up naman hi Vinzel Canes nga nag uukoy ha Balangkayan.
Nakuha naman ni Arial Tobias han Borongan an 1st place han Most Catch Category ngan 2nd place naman hi Edward Montallana nga tikang gihap ha Borongan.
Sumala kan Borongan City Fishing Club Vice President, Karlo Macose, an pauyas in ginbuhat para maipakita iton maibubuga hit Borongan pagdatong ha sport fishing ngan marine tourism.
“Para ha amon ha BCFC ini nga mga pauyas nga amon gin organize is para ma showcase iton borongan ha sport fishing or any marine tourism,” subay ni Macose.
An nasabi nga kompetisyon in anual nga ginbubuhat hiton Borongan City Fishing Club. Yana nga tuig, manilampuson nga nakig-sumpay an oraganisasyon han gubyerno syudad para han yana nga kapistahan han Borongan.