Gintikangan na an pan rehistro han mga bisekleta ha opisina han Tricycle Franchising and Licensing Regulation Unit (TLFRU) ha City Hall, ha pangunguna ni Mr. Emmanuel E. Rivera.
Sumala pa kan Rivera, kinahanglan nga maiparehistro an ngatanan nga bisekleta ha siyudad han Borongan tungod han ginpapatuman nga Bike City Ordinance.
Dugang pa ni Rivera, “Natikadamo na iton mga cyclist ha Borongan City, panuyo pa hini nga panrehistro para han datos kun pira na an cyclist ha siyudad, usa liwat nga rason mapadagmit an pag monitor kun hin-o an tag-ada han bisekleta ngan para malikyan ka-kawat hini.”
In kaso naman hin pagka mayda aksidente, makikita diretso an emergency contact person pinaagi han QR Code System.
Pulong pa niya, an pagproseso han pagrehistro in ngada han Disyembre 11, 2020. Kahuman kumuha han registration form, mabalik hira, ngan dadad-on ngahaw ngada ha City Plaza kaupod an an ira bisikleta, diri irerehistro kun waray nira helmet, tail light, headlight ngan brakes.
Magkakamay-ada pa “Bike Orientation” han mga marehistro para hibaruan an ira mga responsabilidad nga bubuhaton agod malikyan an mga disgrasya ha kalsada.
An mga na edad naman 17 paubos in ginsasagdunan anay nga diri magparehistro pero kun magrehistro man pwede gamiton an ngaran han kag-anak, ha rason nga kun mamay-ada hinabo han menor de-edad an kag-anak an magigin responsable hini.
Dugang pa ni Rivera, usa ka yukot (1000) an marehistro para han sinusugad nga “pilot testing”, an sobra naman hini in magkakamay-ada bayad pero ha minimum la nga kantidad. #
#BoronganonDisiplinadoAko
