Pinanawagan ni City Mayor Jose Ivan Dayan C. Agda an iya mga igkasi-mga Boronganon, nga magtagam kasumpay han pira na ka adlaw nga uuran, nga nagdurot na hin babaha ha mga norte nga dapit nga mga lugar.
Ngani, sumala pa niya, naka alerto iton opisina hiton City Disaster Risk Reduction and Management Office (CDRRMO) para hin kadagmitan nga pag-responde, kun pananglitan pagkinahanglanon.
Ha iya pakipag-himangraw kan Ionnes Omang han Aksyon Radyo DYVL yana nga adlaw, iya ginsagda an iya mga sinakopan nga katawhan nga likayan an pagkinagawas yana nga uuran pa.
“Aton likayan an uuran, kay kun danay asya man daman ini an tinikangan han sip-on, batok ug hiranat nga posible mahingadto hin mas grabe nga arabaton ha lawas, sugad hit sintomas hit nga COVID-19. Maupay nala it paghirot.” Siring han batan-on nga amay han bungto.
Sugad man, igin paangbit gihapon han Mayor an maupay nga notisya han ginbubuhat nga Antigen Swab Testing para han mga empleyado han Goberno Siyudad han Borongan, sugad nga pag-klaro ni Omang.
“Yes. Toto-o nga ginbubuhat an Antigen Swab Testing para han mga empleyado han City Hall, kay ini man gud, in ginkauroyonan han amon mga elected officials, ug mga membro han Inter-Agency Task Force (IATF) para matagan proteksyon an amon mga empleyado,” siring ni Mayor Agda.
“Tungod ini kay iton Borongan in sentro han komersyo ug opisina han mga serbisyo publiko, damo nga klase hin tawo it napakadi ha amon ha City Hall, para hin opisyal ug personal nga mga transaksyones. Salit, kinahanglan amon matagan hin proteksyon it amon mga empleyado nga nakarawat han mga may katuyuanan tikang ha iba-iba nga lugar, ngan para man daman matagan proteksyon an nadaraon ha ira,” dugang pa ni Mayor Agda.
Ini daw gud in libre nga iginhahatag ha mga empleyado, ngan kun mayda man nag-po-positibo ha mga na sa-swab, hira in dayon pinapakadto ha isolation facility para hin “confirmatory test” o pagkonpirmar kun COVID-19 man gud an kagaw nga igin-paabat han Antigen Test.
Pinaagi hini nga Antigen Swab Test, mahimo nga malikyan an pagsarang han kagaw, tungod han madali makuha nga resulta, nga nakukuha largo sakop la in por lo menus 15-minutos.
Samtang, nagsiring pa hi Mayor Agda, nga padayon an pag-anam-anam han iya Health Surveillance Team ha mga mulopyo nga gintatahapan nga naalakbatan han kagaw, agud daw gud ini in matagan hin kadagmitan nga aksyon, ngan para diri na ini magkalyap ha iba pa nga tawo. #
#BoronganonDisiplinadoAko
