Nagkarukayakan an mga representante han magdurudila-in nga sports han syudad para paghimangrawan an mga masunod nga plano han Borongan City Sports Council yana nga tuig, Biyernes, March 11, 2022.
Pinangunahan an miting ni Mayor Jose Ivan Dayan Agda ngan Sports Coordinator Rupert Ambil ha City Mayor’s Office han City Hall.
Parte han ginhimangrawan hine nga pag-aragtubang in an accreditation han kada sports nga mayda an syudad para matagan hin kaangayan nga suporta han City LGU.
“Usa han aton goal para maimprove ngan ma-empower pa iton aton sports activities ha syudad in an pag institutionalize hine nga aton existing sport groups kay pinaagi hine, matatagan nat hin dako nga suporta iton iyo events,” laygay ni Agda.
Usa han ginkukulawan han Borongan City Sports Council nga maging “sports hub” o maging lugar han magdurudila-in nga uyas an Baybay Beach ngan Boulevard para maka-aghat pa hin mas damo nga turista an syudad.
Mahinunumduman nga han naglabay nga tuig 2021, naging manilampuson an 2021 Surf in the City competition kun diin masobra hin 200 nga delegado an tinambong tikang ha iba-iba nga parte han nasud.
Sumala kan Ambil, usa ha mga katuyo-anan han pag promote han syudad in an paghimo han sports ambassadors nga pwede maging representante han Borongan ha mga paisan-isan nga pang nasyonal o di kaya pang internasyonal.
“One of the targets of the city in promoting Borongan is creating sports ambassadors. Aside from hosting events, we want to train our athletes to be representatives of Borongan. And these sports organizations will help in addressing youth development and the care and protection environment,” subay kan Ambil.
Labot la hiton pagpa-uswag han sports ha syudad, gin-aghat gihap ni Mayor Agda nga atamanun an aton kalikasan para balanse an progreso han turismo ngan ekonomiya han Borongan.
Presente hine nga miting an mga sports organization sugad na han HBSK Sports, Borongan City Volleyball Club, BorOngan Sirak RUnners , Borongan Football Club, Borongan Skateboarding Association, Borongan Bike Scouts, Borongan City Fishing Club, ngan damo pa.
