Para hin mas masayon nga panhatag han #LibreMedisina, an unom nga RHUs han syudad han Borongan in may-ada na mga skedyul hin libre nga konsultasyon ha kada barangay dara-dara an an mga medisina tikang ha Borongan City Pharmacy.
Usa ini nga ‘best practice’ nga ginhihimo han mga City Health Doctors, nga diin hira in na base han ira datos han kada napa-konsulta para han pag-preparar han ira mga kinahanglan nga medisina kada bulan. Labi na an maintenance medicines ngan iba pa nga mga pantambal nga medisina.
Siring pa ni Fernanda Lacorte, City Pharmacist, an mga naka-enroll nga may-ada maintenance medicines o kinahanglan nga medisina (an mga mayda na record ha RHU o ha Barangay pinaagi han konsltasyon), in kada bulan na gin-aandam ha City Pharmacy base hiton datos nga ginhahatag ha ira han Nurses ngan Barangay Health Workers (BHWs).
Pinaagi hini, diri na kinahanglan kumadto an usa nga benepisyaryo kada bulan ha parmasya para la kumuha han iya maintenance medicine, tungod kay an Nurses na an nadistribwer hini kabulig an BHWs nga madul-ong han mga medisina ha ira.
Ini nga programa in inisyatibo han City Health Office, nga gintikangan anay ni ni Dr. John Kelly Cainday ngadto han iya RHU nga nasasakupan. Yana, in ginbubuhat na liwat ini nga pamaagi han 5 pa nga mga RHUs: RHU Songco, RHU Maypangdan, RHU Sta. Fe, RHU Lalawigan ngan RHU San Jose.
Sumala kan Dr. Daisy Sacmar, City Health Officer, usa ini nga pamaagi nga mahingadto hin harani ha mga tawo an libre medisina nga diri na kinahanglan bumiyahe o pumasahe para makakuha hin medisina ha parmasya.
Iton team han kada RHU in kaupod an ira Nurses, Medtech, Midwife, BWHs ngan Pharmacist. Kasugbong liwat nira hini nga programa an Barangay council nga nabulig liwat han pagpasilitar han mga tawo.
An pankonsulta in kada semana ginbubuhat ha mga barangay o may-ada nakatalaan nga skedyul. Para mahibulig hini nga programa o para han kasayuran hiton skedyul ha iyo Barangay, alayon pagbisita han iyo mga BWHs, Barangay council o ha pinakaharani nga RHU.
