Nagdumara an National Irrigation Authority (NIA) Regional Office 8 hin Ceremonial Turn Over of Communal Irrigation System (CIS) ngan pagpirma han LGU Borongan han Memorandum of Agreement o MOA, yana nga adlaw, Marso 16, ha Provincial Capitol Gymnasium.
Mahinunumduman nga han Pebrero 24 han yana nga tu-ig, nagbuhat hin Orientation on Communal Irrigation Systems (CIS) Devolution dinhi han City Government han Borongan, kun diin ginsarabutan han NIA ug han LGU nga aakseptaron han syudad ini nga proyekto para han unom (6) nga mga CIS dinhe ha syudad.
“Kun gusto naton ig-develop it aton syudad, dapat pagtuonan hin pansin it agrikultura kasi dida kita nabubuhi. Natuod ako nga in collaboration with NIA and with all the CIS in Borongan, diri imposible nga ma-achieve naton it aton vision nga magkamayda enough nga food supply. Ngan mamayda food security dinhi ha borongan kun pag-uupayon naton it aton mga irrigation systems,” mensahe ni Mayor Jose Ivan Dayan Agda.
Pinangunahan ni Engr. Ruby C. Tuan, Regional Manager, NIA RO8, an pag-turn over han CIS ngan an pag pirma han MOA han LGU Borongan ug han mga Irrigitors Association Presidents ha syudad. Kaupod ni Engr. Tuan hira Rizalina B. Gallarde, Acting Manager, NIA EWSIMO, Dr. Leo L. Gallego, Guest of Honor and Speaker, Nelson Cortez, Provincial Administrator ug representante ni Gov. Ben Evardone.
Siring naman ni Lita Fe A. Celada, Cagbonga Irrigators Association Inc. President, “Dako tam pasasalamat nga mga irrigators hit aton LGU nga gin akseptar ini nira nga proyekto tikang ha NIA. Kun mayda kinahanglan tam mga farmers hit tagsa tagsa nga CIS, harani na tam dadaupan kay aadi na gud hit aton syudad.”
Hi Dr. Leo L. Gallego, NIA Central Office IDD Manager in pinakanhe pa ha Borongan City kun diin tikang pa hiya ha Luzon, para ipa-angbit an iya pagtagusya han syudad.
“Ang maganda sa Borongan ay buong puso nilang tinanggap ang ano mang responsibilidad para mapaunlad ang kabuhayan ng kanilang mga magsasaka,” siring ni Gallego.
Dugang pa ni Gallego, bisan kun na-devolve ngan naturn-over na an CIS ha LGU Borongan, an NIA in mag-gigiya la gihapon hit syudad ha pag monitor ug pagpa-ursa hiton mga irrigation systems didi ha Borongan.
Sumala naman kan Macario Gabornes Jr., City Agriculturist, an iya opisina in asya an magigin “operational arm” hiton syudad ha pagpapatuman han ngatanan nga panuyo hini nga proyekto.
An LGU Borongan an pinaka-una nga syudad nga gin-devolve han NIA mahitungod han CIS ha bug-os nga Rehiyon 8, sumala kan Rizalina Gallarde han NIA.
Presente liwat han nasabi nga aktibidades hira VM Emman Tiu Sonco, SPM Zen Dalina Daza, SPM Atty. Kathlyn B Cainday, CPA, SPM Dr. Katrina Anacta, SPM Lyra Gel Agda Limbauan, SPM Glaiza G. Tiu, SPM Glenn Escoto, SPM Atty. Byron Macabasag Suyot ug hi SPM Kurt Ryan Ty.
#DukwagAgrikultura
