Usa ka adlaw kahuman han Public Forum, naglibot an City Public Market kaupod an City Treasurer Office ngan DTI yana nga aga, Pebrero 23, han merkado publiko han Borongan.
Dida han ginbuhat nga paglibot, nahinkit-an nga mayda na mga karne hin baboy nga ginbabaligya han ira mga stalls ngan ine in hinabubo na hin 20 pesos.
An kada kilo han karne hin baktin in tag Php280 nala, taliwas han pira ka adlaw nga tag Php300 an kilo.
“Maupay nga mayda na nagtitinda hin karne ha merkado, ine in “win-win solution” han mga kunsumidor, hog producers ngan mga meat vendors kahuman han public forum”, ine in siring ni Macario Gabornes Jr. han City Agriculturist Office.
Dugang pa niya, win-win gud ine kay para han mga hog producers hira naman in assured na kay nagpatapod naman an mga meat vendors nga tag Php180 na an pamalit han ira mga baktin.
Para naman han mga konsumidor, an 20 pesos in dakulaay na nga iginhabubo sadang para makaabante pagpalit hin iba pa nga kinahanglan.
“An pagalinsusunod han LGU Borongan han presyo han karne in subay han kan Mayor Jose Ivan Dayan Agda paniguro nga ine in makita dara kay tikang han una nga tuig an Borongan in self sufficient han supply han baktin ha ciudad,” subay pa han pahayag ni Dok Adrian Ang an City Veterinarian dida han nahinabu nga open forum.
Samtang, han pagbisita ha merkado nahinkit an nga mayda siyam (9) nga mga hanging scales ha mga paratinda hin isda in gin kumpiskar ngan usa (1) naman nga digital scale an tikang han meat section.
“An pagkumpiskar in usa nga kinabulan nga buruhaton han City Treasurer Office para regular nga ma calibrate an mga timbangan ha merkado,” eksplikasyon ni Helen Amos han Treasurer Office.
