Gin-abrehan ngahaw yana nga adlaw an ika-tulo nga Youth Leadership Summit o YLS 2021 para han mga kabatan-unan nga nag tikang ha siyam nga barangay han syudad.
Hira in gikan han barangay Can-aga, Bayobay, Cagbonga, San Pablo, San Mateo, San Jose, Balacdas, Amantacop ngan San Andres, nga nagdudumara otro han ira aktibidad ha Headquarters, han 78th Infantry Warrior’s Batallion, ha barangay Lalawigan.
Pinangunahan an pag-abre han programa han YLS nira Mayor Jose Ivan Dayan Agda, LTC Oliver Alvior, Commanding Officer, 78IB, 81D, PA, Danielle Joy Ampong, Social Welfare Officer I ngan May Lanie Anacta, SK Federation President.
Dida han welcome message ni Ampong, iya iginsumat ha mga kabataan nga an nasabi nga YLS in may-ada kapulsanan, ngan mapupuno hira hin hibaro, makakalipay,para han sugad ha ira, kay ha YLS, makakakilala daw hira hin iba-iba nga tawo ngan ira magigin sangkay.
Iginpresentar naman ni Anacta an 76 nga youth participants, nga mayda 39 nga lalake ug hin 36 nga babaye.
Pahayag naman ni Mayor Agda ha mga kabataan nga, nagsering pa, “matapos ine nga programa, hinaot pa unta, ma mayda niyo konkreto nga plano kun ngain niyo pagdadad-a it kabataan ha Borongan ha mga tiarabot nga panahon, kun anu it mga issue nga nakaka apektar ha iyo, kay sering pa han Mayor, dire la iton nga ira pagkadto, pagtinirig-ubon.
“Komo amay han siyudad, hingyap ko unta, nga mag hurma kamo hin mga programa, mga polisiya nga pwede ta magin basaranan hin pagsurat hin balaudnon. Ayaw la kamo pag-alang pagpa gawas hit iyo mga arungot, kay andam kami nga mga opisyales, pamati ha iyo ngan maghatag hin kaangayan nga aksyon, pinaagi hit good governance,” sering ni Mayor Agda.
Iginpatapod pa niya ha iya pamulong an tipadaraon nga P250 Student Allowance para han estudyante han Senior High School ngan Kolehiyo, direkta nga makakarawat hit benefeciaries kun diin an ira magigin ID in pwede dida ig-electronic transfer an kwarta nga ira allowance, dire na nira kaulangan kumada ha City Hall.
Usa pa nga ira matatagamtaman an “Libre Sakay” ha mga estudyante han kolehiyo ngan Senior Highschool, PWDs, Senior Citizen ngan local tourist.
Iginsumat pa ni Mayor Agda nga dire na mag-iiha an pag-abre han mga pharmacy ha Barangay Maypangdan, Santa Fe, San Jose, Benowangan ngan Lalawigan para dire na magkikinadi ha Borongan City Pharmacy an mga taga hirayo nga barangay.
Naghatag naman hin Basic Life Support Training hi Jake Brandon Agda, Administrator Training Section Chief han City Disaster Risk Reduction Management Office (CDRRMO).
#DirektangAyuda
#BoronganonDisiplinadoAko
