Ha panuyo nga mapa-kurokusog pa an pag-alinsusunod o “Contact Tracing” hin mga gin-sususpetsaran nga positibo han COVID-19 ha Barangay Tabunan ug Campesao, ngan para abir mapatuman an hingyap han ngatanan, nga diri na ini nga kagaw magsarang ngadto hin iba pa nga tawo, nagdesisyon an mga hindadabihan nga mga opisyal, upod na an mga barangay officials han duha nga barangay, nga ipailarum hira ha “Hard Lockdown” tinikangan yana nga gab-i.
An “hard lockdown” ha duha nga barangay in bubulkason dayon, oras nga mahikit-an ngan makilala an ngatanan nga mga igin-kaharani han una nga nahi report nag positibo han kagaw.
Ha ginbuhat nga “Consultative Meeting” yana nga adlaw, nabaroan nga hingyap han mga kapitanes han duha nga barangay nga buligan hira han goberno syodad han Borongan nga mapug-ngan sagilayon pananglitan manla, mayda gud gin-su-suspetsaran an mga “health workers”, nga nagdadara-dara han kagaw nga COVID-19 ha ira dapit.
Apisar hini, pinaagi han Public Health and Safety Task Force (PHSTF) han siyudad han Borongan dayon naman gintagan hin sakto nga aksyon, pinaagi han paghatag direksyon ha mga opisyales han duha nga barangay, kun pati-unan-o hira igpapa-ilarum ha “Hard Lockdown”, labot han iba pa nga mga alodaydayan han hapsay nga pagpatuman hini, para matagan hin giya an ira mga sinakopan nga mga mulopyo.
Naka-andam man gihapon an goberno syodad hin panhatag hin ayuda nga pagkaon ha mga pamilya han barangay Tabunan ug Campesao, pinaagi han ipanhahatag nga mga “Food Packs” ha dire maiha nga panahon.
Sugad han mga nahiuna nga mga hitabo, obligado iton goberno siyudad han Borongan ngan responsable hini niya nga matagan hin dagmit nga atensyon, pag-ataman ngan proteksyon an kada mulopyo han lugar, sanglit man, matapos mabatian an hingyap han mga opisyales han duha nga barangay, dayon nga iginpatuman an “hard lockdown” ha barangay Tabunan ug Campesao.
Ha usa pa ka higayon, nasabtan nga importante gud an alerto nga pagsusumpayan han LGU han siyudad han Borongan ug han mga tinapuran nga opisyales ha barangay, kay ha sugad nga paagi manta, masusurapo an ano man nga problema ha mga komunidad, sugad hini nga pandemya han COVID19. #
#BoronganonDisiplinadoAko
