Nagkamay-ada karukayakan o “meeting” yana nga kulop, Huebes nga adlaw, Marso 10, mahe-unong han Petition nga gin-pasa han mga Tricycle Drivers.
Ini in gindumara ha CDRRMO Conference Room ha pangunguna ni SPM Engr. Melcho A. Arago, Chairman han Committee on Transportation and Communication, Atty. Celestino Cabato, City Administrator, Grace Mengote, TFLRU Officer ngan Napoleon Bebita, BCTT Officer, ug an Interim Federated President han BCFTODA nga hi Romualdo Arre, kaupod an iba pa nga mga TODA Presidents ngan trike drivers.
Gin-iristoryan an mahiunong han pasahe kun diin hangyo han mga Tricycle Drivers nga ig-hataas an presyo han pasahe tikang han P9.00 ngadto ha 75% han “minimum fare” kung diin magreresulta na ini hin Php15.75 an kantidad.
Siring pa han mga Tricycle Drivers ira in igin hahangyo dara han pagpadayon nga pag hinataas hiton presyo hit gasolina.
Natratar liwat ha karukayakan an mahiunong han “Body Number” ha mga tricycle nga nabiyahe kun diin nakita an problema han iba nga mga manarakay na reklamo nga mayda pipira nga tricycle nga diri nababasa hin tuhay an numero han sarakyan.
Sumala pa kan SPM Arago, importante liwat ini panginanu-on kay mayda mga insidente nga kun diin mayda nagpapakabaya hin higamit ini in danay diri na nakukuha o nahiuuli tungod nga diri nira nababasa hin tuhay an numero han tricycle.
Gin-iristoryahan gihap an iba pa nga arungot han mga Tricycle Drivers ngan Operators nga kung diin waray pa pinale nga desisyon mahe-unong han ginpasa nga petisyon.
Ginpaplanuhan magkamay-ada karukayakan para naman han mga “public commuters” ha syudad ha masunod nga semana agud matratar an mga arungot liwat nira.
Kahuman han pakikipaghimangraw ha public commuters, ginlalauman nga isusunod diretso ha pag iristorya han mga SP members agun matratar ine nga petisyon.
