Nagpasa na hin petisyon an mga grupo han tricycle operators/drivers ha opisina ni SPM Engr. Melcho A. Arago, Chairman han Committee han Transportation and Communication, kakulop nga adlaw, Marso 8.
Personal nga iginpasa an documento nga petisyon ni Romualdo A. Arres, an Interim President han Borongan City Federated Tricycle Operator/Driver Association (BCFTODA).
Ine in an ikaduha nga bersyon hin petisyon nga ginhimo han transport group nga nagpapahayag hiton ira apila han balik pasahe o an pag implementar ngahaw han Ordinance No. 165 series of 2020, nga diin tag nuebe pesos (Php 9.00) an minimum nga pasahe han pagsakay ha tricycle.
Sumala hine nga petisyon, ira iginduduso an increase nga 75% minimum fare o Php 15.75 nga pasahe.
Sumala pa han kasuratan, wara hustisya an pagbalik han pasahe tungod han pag hataas han presyo han gasolina ha siyudad, nga diin magiging rason hini nga magtika-habubu an pangita han mga napasada ug mga operators, nga posible pa umabot hin pagpatay han industriya hiton transportasyon.
Igin laygay gihap han petisyon nga an kakulangan ha pasaheros ug an pag alang han mga commuters pagsakay hiton mga tricycle nga may-sakay na in usa liwat han mga dako nga rason nga diri sadang an pangita han mga namamasada.
Ha kadugangan, igin-bulig liwat han kasuratan an ira naman pag-diri han pag butang han body number ha printi, gilid, sulod, igbaw, ug han side car han tricycle.
Gintagan liwat hin duon an limitasyon han pagtag-iya hin tricylce nga natubtub la duha (2) nga unit. Hingyap nira nga matugutan an mga nagtatag-ada hin sobra pa hin duha nga unit han tricycle para malikyan an pagka may-ada “dummy account” han pagpa-tansfer ug pagpa-rehistro hini.
Kahuman han nasabi nga pagpasa han petisyon, iginpapahibaro han opisina ni SPM Engr. Arago, nga magkipagsumpayan hi Romualdo Arre ha ira opisina, basi pagbuhaton na an sunod nga pitad mahiunong han ira petisyon.
Siring han opisina ni Engr. Arago, iimbitarun an mga TODA Presidents nga umatindir hin pakipagsumapayan nga matagan na hin aksyon an ira mga arungot.
Ginlalauman nga mababatian liwat iton mga public commuters mahiunong hini nga butang. Magkakamay-ada pakipagsumpayan liwat hiton mga public base matagan hin balanse nga solusyon an nasabi nga sitwasyon.
