Ibabalik an Granular Lockdown ha pira nga mga barangay, sumala kan Atty. Ed Rowland Solidon, City Legal Officer, pira pala ka minutos an linabay dida hin usa nga Zoom Press Briefing kaupod it mga membro hit Borongan City Press Club.
Maabot hin 27 nga mga barangay han siyudad an ipapailarum ha “Granular Lockdown” tinikangan buwas nga adlaw, tungod hin usa nga nag positibo han COVID-19, niyan han linabay nga Biyernes, Nobyembre 6, 2020 ug apiki nga igin-kaharani hin siyam (9) ka-tawo.
Dayon naman nga igin-lain hin ukyanan (isolate) ini nga siyam, sugad man han nag positibo. Sumala han notisya tikang han mga otoridad ha medisina han siyudad, Dr. Bernadette Galacan ngan Dr. Patricia Bernadette Apita, ginkla-klasipikar ini nga kaso han nag positive nga tikang ha “Influenza-like Illness (ILI) Cluster” han iya gintatrabahuan. Hiya in nagkamay-ada sintomas nga sip-on ngan pagsuol han iya lawas hadton ika-30 han Oktubre, 2020, ngan diretso ikinadto ha isolation facility, sumala han mando han Borongan City Health Office (CHO) ngan Provincial Health Office Eastern Samar (PHO).
May-ada hini siyam (9) nga first contacts nga naka isolate na ha Borongan Isolation Facility. Ini nga siyam in maatubang hin “swab test” buwas, Nobyembre 8, 2020, sumala naman kan Dr. Galacan han City Health Unit.
Apisar hini nga panhitabo, hangyo han City Health Office ngan Public Health and Safety Task Force (PHSTF) nga pumirme la anay hit mga balay it katawhan, kun diri man gud gi-iimportantehe nga tuyo ha gawas, samtang ginbubuhat pa an contact tracing, tubtob matodlok an ubos nga “2nd generation contacts” han nagpositibo.
Sumala kan Atty. Solidon, “May-ada pa mga 2nd generation contacts in diri pa nakikilala, rason kun kay ano nga ka-angayan pumirme anay ha mga bablay it mga tawo samtang ginbubuhat it “contact tracing” o an pag alinsusunod han mga igin-kasapit hini nga nag positibo ngan han iya mga “1st generation contacts”.
Importante nga iginhahangyo otro an istrikto nga pagpatuman han health protocols, an pag sul-ot hin tuhay han facemask, “social distancing of at least 1 meter”, pag gamit hit alcohol o pag hunaw hit kamot nga may gamit nga sabon.
Para naman han mga makakaabat hin “Influenza-like Illness” (ILI) nga may sintomas hit trangkaso sugad hit sipon, batok, hiranat ngan masuol nga lawas, hira in iginpapa-monitor ngan diretso i-isolate it kalugaringon o pwede tumawag hit mga “contact tracing hotlines” hit siyudad:
0977 714 2649
0977 714 2644
0977 714 2645
0961 891 9613
0961 891 9612
Ig-papagawas na an bag-o nga Executive Order uru-unina, nga magiging epektibo buwas Nobyembre 8, 2020. #
#BoronganonDisiplinadoAko
