Gintikangan an Para Games 2023 pinaagi hin motorcade ha downtown han syudad ngan nagdumara hin haliputay nga programa ha Brgy. Campesao, yana nga adlaw, Hunyo 27.
Nagin bisita ngan naghatag hin ‘inspirational message’ ha programa hi Roland Sabido, taga Balangiga, Eastern Samar ngan usa nga Gold Medalist han 2022 ASEAN Para Games nga gindumara ha Surakarta, Indonesia.
“Kinahanglan an suporta han mga Nanay, mga kag-anak, kay hi ako han nagtitikang pala ako, an akon Nanay pirme yaada, dire hiya nakaturog hin dire pa ako nakaku-uli, kinahanglan gud an suporta niyo nga mga kag-anak kun ano man an mga pangarap han iyo mga anak,” mensahe pa ni Sabido.
Gintagusya pa ni Sabido an syudad han Borongan nga kun diin nakikita niya ha Facebook nga damo gud an mga sports activities nga nabubuhat dinhe ngan iya pa nahibaruan nga magkakamay-ada cash assistance para han mga PWDs, tuu pa niya ha bug-os nga Pilipinas, dinhi la ha Borongan City an mayda sugad nga ayuda.
Sumala naman kan Verina P. Amoyo, CSWD Officer han Borongan City, an aktibidad in paghatag higayon ha mga PWD nga makapartisipar ha mga sports activities ha syudad para ma-develop an ira mga natatago nga talento nga diin pwede hira mahebuleg ha National ngan International Paralympic Games.
Presente liwat hira Jojito Acla, City Cooperative and Development Officer, representante ni Mayor Jose Ivan Dayan Agda; SPM Lyra Gel Limbauan, Chairman, Committee on Social Welfare and Development; SPM Glaiza Tiu; Cynthia Arceño han City Information Office representante ni City Information Officer Rupert Ambil; ngan coaches ug SPED teachers tikang ha DepEd.
Dida han mensahe ni Acla, iya iginsuhestyon nga igbuleg an mga aktibidad han Para Games dida hit kanan syudad mga sports activity ha masunod nga tu-ig 2024.
Pormal naman nga inabrehan an Borongan City Para Games 2023 pinaage hin ‘lighting of torch’ nga ginbuhat ni Eduardo Galve, anay National Para Games Medalist.
Kahuman han programa, nagkamay-ada hin Sports Clinic an mga coaches ha magdurudilain nga sports nga pagbubuton ha nasabi nga aktibidad.
An nasabi nga aktibidad in ikaduha na ka beses nga ginbuhat ha syudad, pinaniguruhan han opisina han CSWDO ha pangunguna han Focal Person para han PWDs nga hi Danielle Joy Ampong ngan Marilu Villanueva, Disability Affairs Assistant.
Nakatalaan mahuman an Borongan City Para Games 2023 hit Hunyo 30, 2023
#BoronganonDisiplinadoAko #FunBorongan
