Hi Mark Gervin Serona Ty, 25 anyos, taga Barangay Alang-Alang, in nagin Football varsity player ha Lyceum of the Philippines University ha Manila, nga diin nakapag-graduate hiya nga may kurso nga Bachelor of Science in International Hospitality Management with specialization in Cruise Line Operations in Hotel Services. Hiya in nakapag-uyas hin 5 consecutive years ha National Collegiate Athletic Association o NCAA.
“I played NCAA for 5 consecutive years, NCAA season 90 to season 94. Permi kami bulig final 4 and NCAA season 90 naka 2nd place kami,” yakan niya.
Nakilala ni Gervin an football diri ha iskuylahan kundi ha gawas, didto han usa nga ginhimo nga guti-ay nga field ha may Kapitolyo han elementary pa hiya. Habang nagkukulaw han uyas, na-imbitaran la hi Gervin han football coach nga hi Cesar Amago o an ira tawag ha iya “Paps”, nga mag-uyas bisan kun waray pa hini niya experience. Tungod hini, na-inganyar na hi Gervin han pag uyas adlaw-adlaw ug nakapag-training nga diin lima ka beses hiya nakapag-compete ha EVRAA tikang han elementary ngada high school.
Tu-ig 2013, usa hi Gervin nga napili para lumaban ha Palarong Pmabansa nga gindumara ha Negros Oriental, nga diin ini an nagin tulay ha iya nga makitaan hin potensyal nga magin varsity player ha Manila.
Sumala kan Gervin, an pinaka-rason kun kay ano hiya nagin nakasulod bilang varsity player in dara han iya coaches nga hi Coach Amago nga Coach Divino “Dadam” Regis, labi na an iya pamilya nga suportado ha iya.
“After Palarong Pambansa ha Dumaguete, dinirecho po ak hat ha Manila and didto na po at nag start akon career han football as a varsity ha Lyceum. Sobrang thankful gihap ak kan Paps, especially tak family nga sobra ka supportive tak passion,” siring niya.
Dako ngan damo it benepisyo hit pagigin student-athlete, labot pa nga waray niya ginbabaydan nga tuition, libre iton food, accommodation, playing and training uniforms, spike ngan running shoes, football socks, shin guards, water bottle, ngan bag. Labot pa han ngatanan, in may-ada pa nira monetary allowance.
Salit, nagin pursigido hi Gervin han iya pagin student-athlete nga diin prayoridad ha ira iton pag-iskuyla ngan disiplina. Siring pa niya, “athlete sa umaga, estudyante sa hapon.” Maintain an mga grado ni Gervin tungod nga diri pwede makapag-uyas iton athlete ha NCAA ngin may-ada failed nga subject.
Natagan hin tyansa ma-representar ni Gervin an Pilipinas parte han football nga sport, han na-imbitaran hiya han training pool han Men’s National team para han tournament ha Cambodia, pero wara ini pagpadayon tungod nga nagkamay-ada niya injury han iya right hamstring.
Hul-os nga pasasalamat ni Gervin kan Coach Cesar tungod han iya pagin parte han iya football athlete journey. “Gusto ko la mag pasalamat hit Borongan Football Club family hit ira suporta permi nga hinahatag. It akon po masisiring han akon po mga naging coaches dinhe ha Borongan especially kan Paps Cesar Amago, damo nga damo po nga salamat. He’s an amazing coach with a good heart hit tanan nga footballers dinha ha Borongan and not just here in Borongan but also to the other football players here in Eastern Samar.”
Ha pagkayana, hi Gervin in pursigido magtrabaho ug masuportaran an pamilya. Sugad man, karuyag nira suportaran iton football team nganhi ha Borongan pinaagi hiton iya pag coach ngan pag training hiton mga kabataan ha ira Football club. Karuyag liwat niya maging mentor nga diin hingyap niya nga makapag-prodyus hin Boronganon nga football player nga madadara ha national ug international level competitions.
“Focus la kamo hit iyo passion, focus la kamo hit iyo goal and pangarap. The number one weapon hit pagiging maupay nga athlete is “discipline”. Bisan po gaano kam kaupay nga athlete pero waray kamo disiplina, useless la po it. Tapos be humble la po dama kamo permi. We need to respect our coaches kay hira po it usa nga way para mag improve and mag maupay pa it usa nga athlete, we just need to listen and apply tanan po nga advice and motivation nga hinahatag hit coach. Also, ayaw po niyo pababay’e iyo acads. Ig balance la po niyo iyo studies and sport. Ayaw la po niyo susuko’e it iyo mga pangarap as an athlete, always believe that you can and always do your best when you play your sport. Treat every game as a championship game,” mensahe ni Gervin ha ngatanan nga athlete nga nagtitikang pala.
Usa ini nga paagi hiton pag-kilala han mga atleta hiton syudad han Borongan. Hingyap han LGU nga mag-padayon pa ini pinaagi hiton Borongan City Sport Development Council nga mahatag hin pag-alalay ngan suporta ha magdurudila-in nga sports organization, tikang hiton mga atleta ngada htion mga coaches ha syudad.
#FunBorongan #BoronganonDisiplinadoAko
