Pormal na nga inabrihan pinaagi hin haliputay nga programa, yana nga adlaw, Agosto 17, an Fiesta Cup Inter-town Basketball Tournament nga pinangungunahan han City Government of Borongan ngan han sports organization nga Borongan United.
Kabulig hini nga paisan-isan an siyam (9) nga team tikang ha Arteche, Dolores, San Julian, Guiuan, Salcedo, Hernani, Llorente, Maydolong ngan syudad han Borongan.
Presente hi Mayor Jose Ivan Dayan Agda, Vice Mayor Emman Tiu Sonco, ngan pira nga mga department heads han LGU-Borongan.
Ha iya mensahe, igindu-on ni Mayor Agda nga natu-od an City Government nga pinaagi hin damo nga sports activities, malilikayan hit mga kabataan ngan katigurangan it addiction ha droga. Kaulangan liwat an pag-admitar hit kapirdihan o an diri pagraraot hin bu-ot kundi mangibabaw an sportsmanship ha kada usa.
Iya liwat igin-anunsyo nga magigin tulo (3) na an basketball court ha syudad, ngani ha pagkayana in on-going na an pag-construct hin basketball court ha Baybay Boulevard dara nga natikadamo na an karuyag mag-uyas hin basketball ha syudad, para matagan hin higayon an mga intresado pa nga diri na-aakomodar han usa la nga basketball court.
“[What] we are trying to do in Borongan is [for us] to be known as the Capital of Sports Tourism, asya ngani nga pinahalu-ag ta pa an sports activities ha Borongan, diri la basketball ngan some of them are done at Baybay Boulevard. Karuyag liwat namon i-promote nga an Borongan in maaram kumarawat hit mga bisita, nga an mga Estehanon mag-upay it aton character, di kita mga pasikatero, maupay kita mag-estimar hit aton mga bisita”, dugang pa niya.
Pormal naman nga titikangan an uyas yana nga ala una (1:00PM), an paisan-isan kun diin maglalaban an team han Guiuan ngan Maydolong.
#FunBorongan
