Gindistribwer yana nga adlaw, Enero 13, ha Eastern Samar National Comprehensive High School Gym an siyahan nga payout han tu-ig 2024 han Direkta Ayuda nga programa, ayuda pinansyal para han mga Boronganon nga estudyante ha Senior High School ug Kolehiyo nga naiskuyla ha syudad o aadto ha gawas han Borongan City (outbound).
Sumala han datos han Borongan City Social Welfare & Development Office, 1,530 nga mga benepesyaryo nga estudyante an kinarawat ha ESNCHS para han siyahan nga iskedyul, kun diin naka-karawat an kada usa hin Php 1,500 para han primero nga semestre han school year 2023-2024, nga nabalor hin Php 250 an kada bulan nga ayuda.
Pagbubuhaton naman an iba nga iskedyul han payout ha mga masunod nga adlaw, diin 6,156 nga estudyante an kabug-usan nga matatagan hini, siring han CSWDO.
Ginpasilitaran an nasabi nga payout han team ha opisina han City Treasurer’s Office ngan CSWDO.
Mahinunumduman nga ikatulo na ini ka-beses nga panhatag han Direkta Ayuda nga pinondohan han LGU-Borongan ngan pinaniguruhan nira Mayor Jose Ivan Dayan Agda ngan Vice Mayor Emmanuel Tiusonco kaupod an mga Sangguniang Panlungsod Members, labi na ni SPM Lyra Gel Limbauan komo Chairman han Committee on Social Welfare & Development. An nasabi nga panhatag han mga estudyante han syudad in gintikangan han nakalabay nga Enero 2023, subay han Ordinance No. 241, Series of 2022.
