Igin-pahayag ni Gerardo Bula, City Agricultural Technologist, nga an Department of Agriculture (DA) in may-ada proyekto nga tinatawag “Rice Resiliency Project” ha ilarum han “Ahon Lahat, Pagkain Sapat (ALPAS) Kontra COVID-19 Program”.
Sumala kan Bula, benepisyaryo han programa an mga parag-uma hin humay han bug-os nga nasod agod magka may-ada abilable nga supply hin bugas pinaage han pagpahatas-i han ira produksyon.
Siring pa niya, kasumpay hini, makakakarawat an syodad han Borongan hin 800 ka sako nga de-kalidad nga mga gahi, basar han kahaluag han hagna han syodad nga aada por lo menos ha 800 ka ektarya.
Nabaroan nga, inabot na an siyahan nga 100 ka sako hin mga “high quality rice seeds” o, primera nga klase hin mga gahi, tikang ha DA, niyan han ika-17 han Nobyembre.
Ini in una na nga ipinanhatag ha mga “early planters” o adton mga nan-hiuna magtanom han ira mga gani hin humay, sugad han Barangay Can-aga, Sta. Fe, San Saturnino, Tabunan, Maypangdan, Libuton, Maybacong, Cagbunga, Bayobay, Lalawigan, Can-abong, Calingatngan, Balud, Surok ngan San Mateo, dugang pa niya.
Siring pa niya, an mga rehistrado han Registry System for Basic Sectors in Agriculture (RSBSA) nga nakalista han master list han opisina han Agriculturist an matatagan han nasabi nga gahi.
Kan Bula naman iginpahamtang nga maghulat-hulat la an iba nga waray pa pakakarawat, kay maabot pala an sunod nga 600 ka sako hin mga gahi hit tiabot nga bulan hit Disyembre.
Tungod han pagkadelatar han pagka-abot hini, ngan nakapag marukbuk na pa god iton iba nga mga parag-uma, hangyo ni Bula nga, “Diri pag budlon o ipa-molino ini nga gahi, para magamit hiton sunod nga kat-tanom”.
Malinampuson naman an produksyon han mga parag-uma, nga nakapag-produser hira hin de kalidad nga mga humay, dara han inihatag nga abono an LGU han nakalabay nga ika-17 han Mayo 2020.
Mahinunumduman nga nagsiring hadto hi Mayor Dayan Agda nga, “Kinahanglan nga dako it suporta it ihatag hit mga parag-uma labi na nga hira an pinaka-importante nga sektor nga dako it kontribusyon hit siyudad, kay hira iton nahatag hit panguna nga pahinahanglan ha pagkaon labi na yana nga may krisis”. #
#BoronganonDisiplinadoAko
