Nagkatitirok an 13 nga ‘grantees’ tikang han mga youth and school organizations han syudad para han ceremonial awarding han nakantidad hin 50,000 US Dollars nga Youth Climate Action Fund nga pinondohan han Bloomberg Philanthropies ha SP Session Hall dida han Biyernes. Una na nga igindistrebwer an pondo han nakalabay nga bulan han Septembre.
Ini an ESSU-Borongan Biology Society, Barangay San Mateo Youth for Peace-SMYP, Calingatnan Youth Organization, Sangguniang Kabataan & Pepelitan, Barangay Sohutan Youth Organization, Environmental Science Students’ Organization (EnSSO)-Environmental, LNHS -Secondary Supreme Secondary Learner Government (SSLG), Lalawigan National High School Youth, Maybacong Youth Organization (MYO), E.S.N.C.H.S YES-O ( Youth for Environment School’s Organization), Punta Maria Youth Organization ngan Calingatnan National High School YES-O Club.
”Ini in mahinungdanon para ha amon ngan ha mga Boronganon kay first time in the city nga hi kamo nga mga kabatan-unan nga tinatagan kamo hin higayon pag craft hin mga programa, proyekto, polisiya nga hiunong [hit kun] paano naton maproprotektaran iton aton natural resources. This is a milestone ngan it makaruruyag hini this is funded not by our city but by a philanthropist, asya iton dako it impact, siring ko pa magin successful ngani in inga ira 50,000 US dollars nga igin-download nganhi hit aton city ngan iyo ungud-unguron hit iyo pag-implement hit iyo mga proposal ngan programs gidadakui it aton chance nga an 50,000 US dollars ire-release pa, yakan ni Mayor Jose Ivan Dayan Agda, diin personal nga tinambong han nasabi nga aktibidad.
Presente liwat hira SP Member Rozene Daza, komo Chairman han Committee on Environment, SP Member Frich Uy; SK Federation President Jimuel Adona,; City-ENRO Head, Jojito Acla ngan Dr. Deogracias Paano, Head of Project Management Office
Sumala naman kan Perlita Gacutno, staff han CRC, an Borongan in swerte nga nakakatagamtam hine nga nasabi nga Youth Climate Action Fund tikang ha Bloomberg Philanthropies kay ha bug-os nga Pilipinas duha la an napili hini, upod an Borongan City. Ig-iimplementar naman ini pinaagi han LGU ngan mga napili nga youth groups.
Ginsara naman ini han team han CRC, City-ENRO, Local Youth Development Office ngan SK Federation of Borongan City.
An Bloomberg Youth Climate Action Fund in usa nga grant nga iginhahatag han Bloomberg Philanthropies, usa nga organisasyon nga gin-establisar ni Michael Bloomberg, UN Special Envoy on Climate Ambition and Solutions ngan anay mayor han New York City. Nahimugso an nasabi nga grant dinhi ha Borongan mahuman umatender hi Mayor Agda han 28th Conference of Parties ha Dubai, diin hira nagkita ni Mr. Bloomberg.