Kinarawat ni Lola Restituta D. Cabus an pahalipay nabalor hin P50K tika han Goberno Siyudad han Borongan, tungod han iya pakatong-tong han pangidaron nga 101 niyan pa han ika-8 han Disyembre, tuig 2020.
Hi Lola Tuta in usa la han tulo nga kalagsan nga inantabayanan an birthday han City Social Welfare and Development Office(CSWD) kay asya mismo an adlaw han ira pag-abot han edad nga 100.
Subay han Republic Act No. 10868 (An Act Honoring & Granting Additonal Benefits to Filipino Centenarians Act of 2016), malipayon naman nga igin-alotaga an pahalipay ni City Mayor Jose Ivan Dayan Agda, komo hiya gihapon in nalilipay nga mayda pa sugad nga mga tawo ha iya hinsa-sakopan, nga bugway ug magbaskog it panlawas, nga naabot hin sugad nga hataas nga pangidaron.
Ha di pala maiha, ginkilala na ngan kinarawat ni Lola Tuta an pahalipay ha iya han Goberno Siyudad han Borongan, pinaagi kan City Administrator Atty. Celestino Cabato, CSWDO ug Senior Citizen Organization President, Bernardita Apita.
Hi Lola Tuta in mayda upat nga anak, ngan ini hira in kompleto pa, an suhag nga anak ni Lola Restituta in may edad nga 74 ug an pudo in na edad hin 61.
Mahirot daw han pagkaon ini nga lagas, ngan pirmi nasarig han Ginoo, an iya naman mga anak in pirmi andam paghatag hin hul-os nga paghigugma ngan pag-ataman ha iya.
“Usa nam nga prebelihiyo nga makapag-serbi kami nga mga anak kan Nanay nga inabot ha sugad nga pangidaron. Kumbaga balos na in nam han iya pag-ataman ha amon. Malipayon kami nga gin-seserbihan hiya. Sige gihapon iton pag ampo hit amon nanay nga matalwas na kita ngatanan hini nga aton inaatubang nga krisis nga COVID-19, kay amon hiya gin iistoryahan mahi-unong hini nga kagaw,” sumala kan Edgar Cabus, an pudo nga anak ni Lola Restituta.
Nakatalaan gihapon nga premyohan han DSWD, hi Lola Tuta nga maabot hin P100,000.00. #
#BoronganonDisiplinadoAko
