Dinuyugan ug ginkaurusahan hin magduru-dilain nga personalidad an “Grand Ball” han Borongan City Fiesta Vesper Night, han besperas han syudad, Septembre 7, ha maanyag nga City Plaza.
Pinuno ini hin sarayaw ha sulod han plaza ngan magkarulaw nga nagin testigos han mag-upay nga pamahungpahong han mga nagpakisayaw. Kinantahan naman an mga nagpakisayaw han maghiyom-hiyom ug mag-upay an boses nga “singers” han 81D Stage Band.
Inatenderan ini han City Officials ha pangunguna ni Mayor Jose Ivan Dayan Agda, Vice Mayor Emmanuel Tiusonco, kaupod an iya mga Sangguniang Panlungsod Members.
Presente liwat hi Cong. Maria Fe Abunda han Lone District of Eastern Samar, pira nga Provincial Officials, pira nga Municipal Mayors han Eastern Samar, ‘balik-bayans’ nga anay tuminongnong ha Borongan City, mga turista, mga bisita tikang ha gawas han syudad ngan pira nga departments heads han LGU-Borongan.
An nasabi nga okasyon in pinangunahan han City Government han Borongan, City Fiesta Finance Commitee ha pangunguna ni Dr. Rowena L. Agda ngan Mr. & Mrs. Engr. Jesus “Toting” Amoyo Jr., Hermanos 2023.
An kikitaon han sarayaw in mahingangadto han restorasyon ha Hamorawon, sumala ini kan Alicia Nicart, usa han mga ‘hosts’ han ginbuhat nga Vesper Night Grand Ball.
#FunBorongan
