An Committee on Women, Children and Family Welfare, ha pangunguna han Chairman, hi Konsehala Atty. Kathlyn B. Cainday, in nagkatirirok para pag-iristoryahan an mga importante nga butang mahiunong han ginhihimo nga Borongan City Children’s Code of 2023.
Hine nga pagpatawag in ginhimo para mahibauran an hapagkayana nga sitwasyon hit mga kabataan ha syudad ha Borongan. Sugad pa ni Konsehala Atty. Cainday, “ine nga aton Children’s Code karuyag ko dire la hiya maging “mere list of policies” kundi maging relevant ngan responsive hiya hit yana nga panahon o sitwasyon, para gihap pag na-approve na hiya mas mahigamitan ngan mahiimplementar hin maupay.”
Nagkaurusa an mga inatendir han katitirok han pagkilala han mga problema ug sitwayon nga kinahihimutngan han mga kabataan dinhe ha Borongan, ha parte han panlawas, kumunidad, panimalay, ha eskuylahan ug ha iba pa nga aspeto.
Gintawag gihap hine nga katitirok an mga lider ug representante han mga Student Government ha Eugenio S. Daza Pilot Elementary School (ESDPES), ngan Eastern Samar National Comprehensive High School (ESNCHS). Naging importante an ira pagbulig kay naghatag hira hin mga datos ug istorya ha persepsiyon naman hit kabataan.
Bag-o maghuman an katitirok, nagsiring hi Konsehala Atty. Cainday, nga ha mga masunod nga adlaw in magkakamay-ada ngahaw katitirok kaupod naman an iba nga mga opisina, ahensiya ug personalidad nga makakabulig han aton Borongan City Children’s Code.
Masisiring pa nga han October 2022, nagkamay-ada hin 4-day workshop nga ginpartisiparan han City Social Welfare Office (CSWDO), Opisina ni City Councilor Atty. Kathlyn B. Cainday, Caritas Borongan, Save the Children Philippines, Center for Empowerment and Development Inc. (CoPE Inc.), Philippine National Police (PNP) Borongan, Borongan City Division Office, City Health Office ngan Department of Interior and Local Government (DILG) Borongan. Ha nasabi nga workshop, naghatag an tagsa tagsa hin mga datos ug detalyi nga pwede ig-upod han mga probisyon han hinihimo nga balaud.
Kaupod han nasabi nga katititrok han January 24, 2023 in hira Konsehala May Lanie Anacta-Germino, Dr. Anna Katrina Anacta-Sadac, Maria Florlita Mocorro, City Local Government Operations Office (CLGOO), Emma Ogdalla, ESDPES Principal, mga representante ha CSWDO Arianne Cabiatao, Gilda Rodelis ngan Ronnie Afable, PCPL Erwin Caspe ngan PSSG Ernestine Rodriguez, PNP Borongan, Gerlyn Rose Duran, ESNCHS SSG President, Dexjade Andrei Rubio, ESNCHS SSG Representative, Summer Loraine Chua, ESDPES SSG President ngan iba pa nga mga representante han iba iba nga opisina.
Press release from the Office of City Councilor Atty. Kathlyn B Cainday, CPA
#BoronganonDisiplinadoAko
