Personal nga ginkarawat han usa nga centenarian han Brgy. Songco, Borongan City an tseke nga nagkakantidad hin 50,000 pesos pinaagi han Borongan City Social Welfare and Development Office.
Ginkilala nga hi Ana Galve Amoyo o mas kilala nga Nanay Aning, nga natawo dida han Enero 26, 1924, an syahan nga centenarian nga nakakarawat hin grant yana nga tuig.
“Salamat sa Diyos labaw han ngatanan,” asya ini an ginyakan ni Nanay Aning kataliwan pakianhan kun ano it iya gin-aabat nga 100 na iton iya edad.
Sumala kan Teresa Amoyo Lagria, 75 anyos, suhag nga anak ni Nanay Aning, an pagigin mahirot ha pagkaon, ha lawas, ug an tama nga ehersisyo an iya nakikita nga mga rason nga hi iya nanay in inabot ha sugad nga edad.
“An kadaan nga mga batasan han kalagsan, menstruation ngani diri naparigo, diri nagkikinaon hin mag aslom, maasin…kun ano an abaton nga makontra han iya dughan di niya kakaonon,” segun han iya anak.
Hi Nanay Aning in nakatalaan gihap kumarawat hin 50,000 pesos tikang ha Provincial Government of Eastern Samar ngan 100,000 pesos naman tikang ha Department of Social Welfare and Development Office ha ilarom han Centenarians Act of 2016, “An Act Honoring and Granting Additional Benefits and Privileges to Filipino Centenarians and for other Purposes.”
Pinangunahan an nasabi nga awarding ni CSWD officer Verina Amoyo kaupod hira Zenaida Rapada, Presidente han Office of the Senior Citizens Affair (OSCA), Virgie Buna, President han Federated Senior Citizen’s Association of Borongan (FSCAB), ngan Atty. Celestino Cabato, representante ni Mayor Dayan Agda.
Mahinunumdoman nga an kantidad han tseke in bulig pinansyal han LGU Borongan ngadto ha kada centenarian nga Boronganon dida ha ilarom han Ordinance No. 129, Series of 2017, “An Ordinance Honoring and Granting Additional Benefits to Centenarian Boronganons and for other purposes.”
