Gindistribwer na an Monthly Monetary Allowance para han Persons with Disabilities o PWDs ha Borongan City nga natikang han pondo han LGU-Borongan, ginbuhat ha Multi-Purpose Building, Barangay Campesao, yana nga adlaw, Enero 8.
Inabot hin 468 nga PWDs an kinarawat hin Php 2,500 para han bulan Marso-Disyembre 2023.
Mahinunumduman nga naaprubaran an Implementing Rules and Regulations (IRR) han City Ordinance No. 251 Series of 2022 han nakalabay nga Pebrero 2022.
An Monthly Monetary Allowance han kada PWD ha syudad in Php 250 kada bulan ngan nakatalaan nira makarawat an allowance hin tulo ka-beses sakop hiton usa ka-tuig, partikular para han bulan han Abril, Agosto ngan Disyembre.
Nahimugso an nasabi nga programa dara han paningkamot han LGU-Borongan pinaagi han pagburublig han city officials ha pangunguna ni Mayor Jose Ivan Dayan Agda, VM Emmanuel Tiusonco, ngan SP Members labi na kan SPM Lyra Gel Agda Limbauan-Devora komo Chairman han Committee on Social Welfare and Development.
Pinangunahan an nasabi nga payout ni Verina Amoyo, CSWD Officer; Danielle Joy Ampong, Focal Person han PWDs; Marilu Villanueva, Disabilities Affairs Assistant; ngan Zenaida Magbago, Federated President han PWDs ha syudad.
Gin-asistaran naman ini han opisina han City Treasurer’s Office ha pangunguna ni Perpetua Amoyan kaupod an iya team.
Sumala han datus han Borongan City Social Welfare and Development Office, naabot na hin 882 an mga rehistrado nga PWDs ha Borongan City.
