Inabrehan kakulop nga adlaw, Disyembre 1, an bag-o nga One Town, One Product Hub o tinatawag nga OTOP Hub han probinsya han Eastern Samar, nahimumutang sapit han Booking Office, Fun Borongan Building ha Baybay Boulevard ha syudad han Borongan.
An OTOP Hub in magseserbe nga display center han mga lokal nga produkto han Borongan City, pati na an producers ngan exhibitors han iba nga bungto han probinsya han Eastern Samar.
Sumala kan Ruthelma Samonte, Provincial Director han Department of Trade and Industry – Eastern Samar, an pag-abre han nasabi nga proyekto in kaparte han DTI ‘strategic goal’ nga makahatag hin ‘innovative’ ngan ‘competitive products’ tikang ha bug-os nga Eastern Samar.
Sumala naman kan City Information Officer Ruperto Ambil II, an nasabi nga inisyatibo in maghahatag hin direksiyon para hit aton identidad, mga produkto, ngan kun diin kita nahimumutang. Dugang pa niya, an sugad hini nga mga butang an giniiristoryahan ha bug-os nga Pilipinas ngan bug-os nga kalibutan.
Pormal naman nga inabrehan an proyekto pinaagi hin pagbendisyon ni Fr. Joemar Bacucang ngan ‘ribbon cutting’ nga inatenderan nira City Councilor Victor Franco, City Cooperative Development Officer Jojito Acla, Glicerio Bebita komo representante ni Cong. Marcelino Libanan han 4Ps Partylist, Pedro Bimbo Tan han DTI Region VIII, Provincial Tourism Officer han Eastern Samar nga hi Neil Alejandro Pinarok, ngan ni Ms. Cora Basada, an representante ni Congresswoman Maria Fe Abunda.
#FunBorongan
