Gintikangan yana nga adlaw, Agosto 15, an tulo ka adlaw nga paghag-id mahiunong han Integrated Natural Resources Management and Planning nga gindumara ha Primea Hotel, Borongan City.
Pinartisiparan ini han mga representante han mga opisina han LGU-Borongan sugad han Borongan City Environment and Natural Resources Office, City Agriculturist Office, City Planning and Development Office Office, City Risk Reduction and Management Office, Project Management Office, Borongan Forest Ranger Association ngan tikang han opisina ni SPM Rozene Daza komo hiya an Chairperson han Committee on Environment and Climate Change. May-ada naman pira nga tikang ha ahensya han Department of Environment and Natural Resources (DENR) ngan Samar Island Natural Park (SINP).
Presente hi City Mayor Jose Ivan Dayan Agda kun diin nagpasalamat hiya ha Climate Resilient Cities (CRS) nga nagigin partner ha pagkayana han syudad pagdumara hin sugad nga aktibidad.
Sumala pa ha iya, dako nga bulig an pagsulod han CRS ha LGU-Borongan, kay tikang han pagtagi ha ira hin guti nga espasyo, sunod-sunod na an mga programa nga dire nagasto an syudad, salit dako an natitipid.
Naghatag pa hiya hin mensahe han partisipantes nga gamiton an ira mga trabaho hin maupay.
“Use your function nga magin maupay, i-weaponize ta in a good way, it mga balaud, let us not use to castigate hit aton igkasi tawo”, mensahe pa niya.
Nagin tagapagyakan naman hi For. Ernie Urriza han ENP, para han tulo ka-adlaw nga paghag-id.
