Kaparte han pagselebrar han Annual Arbor Day ha syudad han Borongan, naghurar in 65 nga Deputized Environment and Natural Resources Officers (DENRO’s) ha atubangan ni Glenn B. Graciano, Chief Enforcement Division, DENR-Region 8, ginbuhat ha SP Session Hall, yana nga adlaw, Hulyo 28.
An Borongan City DENRO’s in mga boluntaryo han mga barangay nga may-ada nasasakupan nga kagugub-an ngan coastal areas ha syudad, kun diin hira na in otorisado magpatuman ha pagdakop hin mga na-illegal parte hin pag-abuso han mga kakahuyan ha syudad.
Usa pa nga highlight han nasabi nga aktibidad an panhatag hin cash prizes ngadto han mga partisipantes han primero nga paisan-isan han “BIGGEST FOREST TREE” ha syudad kun diin nagdaog hi Armando Capones, taga Barangay Hebacong, usa nga casual employee han Sea of Clouds and Nature Park. Base han ginbuhat nga ‘tree tagging’ nga ginbuhat han City-ENRO, nahitudlok ni Kuya Armando in ‘white lawaan’ nga nasukol hin DBH (diameter at breast height): 205cm, nahimumutang ha nasabi nga barangay.
Sinundan ini ni Rotsen Job Silvero, OJT han City-ENRO, nga nakapagtudlok liwat hin white lawaan, DBH: 190cm, nga nakit-an liwat ha Barangay Hebacong. Ikatulo naman nga dinaog hi Punong Barangay Adan Carpina han Barangay San Andres, kun diin iya naman nahitudlok in usa liwat nga white lawaan sakop han ira barangay ngan nasukol hin DBH: 157cm.
Sumala kan Vickymae Gavilan, Environmental Specialist II han City-ENRO, an nasabi nga paisan-isan in ideya ni City Mayor Jose Ivan Dayan Agda para hibaruan kun hain naka-lokasyon an mga dagko nga mga kahoy ha syudad para maprotektaran.
Siring nga niya nga pagbubuhaton pa ha mga masunod nga tu-ig in parehas nga paisan-isan ngan ginlalauman nga damo an mahatag hin ‘entry’ ngan mapartisipar para mahibaruan pa kun hain nahihimutang an mga dagko nga kahoy ha syudad.
An Annual Arbor Day Celebration in sumala han Ordinance No.119, Series of 2015, kun diin igindeklara nga an kada urhi nga adlaw han Biyernes han Hulyo in igseselebrar an Annual Arbor Day ha syudad han Borongan.
Presente liwat han aktibidad hi Virgilio C. Gabornes, Senior Forest Management Specialist han DENR-Region 8, SPM Victor Franco, representante ni Mayor Agda, Jojito Acla, City Cooperative and Development Officer ngan Marlon Ortiguesa, City ENRO-Officer.
