Gindumara an pinakauna nga ‘Outreach Program’ ha syudad yana nga tu-ig 2023, ha Barangay San Andres, kun diin usa nga bulig han 9 Retooled Community Support Program o RCSP barangay ha syudad han Borongan, Miyerkules, Hunyo 7.
Nahimugso ini nga aktibidad pinaagi han City Social Welfare and Development Office (CSWDO Borongan City) ha pangunguna ni CSWD Officer Verina Amoyo ngan iya mga staff.
Sumala kan Amoyo, an ‘outreach program’ nga ginbuhat in suportado han City Government pinaage kan Mayor Jose Ivan Dayan Agda kaupod an iya mga kasugbong ha konseho nga diin nagsusugo ha mga opisina nga ig-aapi ha mga aktibidades an pagbibisita ha mga barangay, dire la maghihinulat nga pirme an tawo an mabisita ha city hall kundi kakadtu-on liwat hira agud mapanginano kun ano pa an pwede mahimo nga kaupayan han syudad para ha ira.
An opisina han CSWD in usa nga nagpapatuman han mga social services han LGU Borongan salit magdurudulian nga programa an ira ginpaabot ha nasabi nga barangay sugad han pag-organisar han Philippine Youth Association, pan-rehistro han Persons with Disabilities (PWDs) ug Senior Citizens, pag-asister nga makompleto an mga rekisitos nga dokumento han Social Pensioner ngan Monthly Monetary Allowance, Parent Effectiveness Session (Positive Parenting), Assessment of Day Care Program, Mass Feeding for Children ngan panhatag hin mga ‘used clothing’.
Usa pa nga panuyo han opisina nga hibaruan an mga problema han magdurudilain nga sektor ngan sugadman an ira pa mga hingyap nga kaupayan ha barangay.
Mahinunumduman nga han nakalabay nga tu-ig han 2021 in nagdumara hin pulong-pulong an opisina han CSWDO ha barangay kun diin iginpaabot han mga molopyo nga karuyag nira makalsadan an ira barangay ngan matagan hin panubig.
Sobra naman an kalipay ni Tatay Alejandro Amosco, 81 anyos, residente han Brgy. San Andres, siring niya nabaton na daw han City Government ha pangunguna ni Mayor Agda an maiha na nira nga inop nga makalsadan ngan ha magkamay-ada na nira hin malinis nga panubig ha ira barangay. Nakakatagamtam pa daw an iya mga igkasi-Senior hin mga medisina pinaagi han Libre Medisina nga programa ngan nakakabenipisyo hira han kanan Social Pension ngan Monthly Monetary Allowance.
Dugang pa ni Tatay Alejandro, maiha na nga panahon an naglabay ngan inedad hiya hin sugad, yana la natuman an ira maiha na nga hingyap, salit nagpapasalamat hiya nga mas mapapasayon na an pagdangat han mga hinabang ha ira dara han ginpapakaupay nga kalsada.
Hingyap naman ha pagkayana han mga molopyo han Brgy. San Andres nga magkamay-ada na nira Barangay Covered Court ha di maiha nga panahon para may-ada sisirungan han mga bisita ngan mga tawo kun may-ada sugad nga aktibidad.
#BoronganonDisiplinadoAko
#DirektaAyuda
