Personal nga iginduhol ni Borongan City Social Welfare and Development Officer Verina Amoyo kaupod hi Analyn Cabalfin, Focal Person han Senior Citizen, in usa nga tseke nagkakantidad hin 50,000 pesos ngada kan Restituta Mabao Aljibe, usa na nga centenarian, in natawo han tu-ig 1923, residente han Barangay Songco, Borongan City.
An nasabi nga kantidad han tseke in bulig pinansyal han LGU Borongan ngadto han kada centenarian nga Boronganon dida ha ilarom han Ordinance No. 129, Series of 2017, “An Ordinance Honoring and Granting Additional Benefits to Centenarian Boronganons and for other purposes”.
Sumala kan Milagros Aljibe, 81 anyos, suhag nga anak ni Lola Restituta, hi iya Nanay in dire natumar hin para ha iya maintenance kundi natumar la hin vitamins, hit saka semana nakakausa la ka beses kakaon hin karne, puro isda ngan utan it iya kaurugan kinakaon.
“Makaka-on laak, mamayda la luto bisan la asin, nadire ak hit magtig-a, isda ngan utan la it ak kinahanglan pirme,” sagbang han lagas nga centenarian, han pagpakiana ni CSWD Officer Amoyo kun ano an iya karuyag paliton han iya kinarawat nga ayuda.
Prsente liwat hi PB Leslie Nicart han pagduhol han ayuda ngada kan Lola Restituta.
Labot la han kinarawat niya tikang ha LGU Borongan, natagan liwat hiya hin ayuda tikang ha Provincial Government of Eastern Samar kun diin personal liwat nga idinuhol ni Gov. Ben P. Evardone. An Department of Social Welfare and Development Office naman in nakatalaan liwat humatag ha iya hin 100,000 pesos dida ha ilarom han Centenarians Act of 2016, “An Act Honoring and Granting Additional Benefits and Privileges to Filipino Centenarians and for other Purposes”.
#BoronganonDisiplinadoAko
