Gintagan hin cheke nga nagkakantidad hin Php20,000 an 34 nga Former Rebels (FRs) o Peace Builders Group han Borongan City ngan Maydolong Area, pinaage hin ‘Awarding of DSWD-SLP Livelihood Settlement Grant’, kanina han kulop, Septembre 22, ha Headquarters han 78IB, nahimumutang ha Lalawigan, Borongan City.
An igindistribwer nga cheke, in hatag tikang ha Department of Social Welfare and Development buleg han goberno para hin patikang nga pakabuhe base han ira mga project proposals.
Sumala kan Hermanito Mangalao, SLP-Regional Program Coordinator, “An aton pang-gobernohan yana in nagsusulong hin pangkamurayawan dinhi ha bug-os nga nasud partikular ha Rehiyon 8, usa ini nga prioridad han aton Philippine Development Plan, mahitungod hine nga hingyap hit aton goberno, the EO No.70, Series of 2018 para han kasuguanan han ngatanan nga ahensya han goberno pagkaurusa ngan pagpasilitar han mga serbisyo ngan programa para han kamurayawan han bug-os nga nasud.”
Sering naman ni LTC ALLAN T TRIA INF (GSC) PA, Commanding Officer, an ipinanhatag nga kantidad in an saad na han goberno nga gintuman, sana daw in makabulig ha mga FRs ngan mapalago pa nira an ira pagtutukuron nga negosyo ug makabuleg ha ira pag-asenso.
Presente pa hi Verena P. Amoyo, CSWD Officer ngan representante ni City Mayor Jose Ivan Dayan Agda, kun diin iya igintugon ha mga benepesyaryo nga seryoso gud it goberno urog na labi hi Mayor Agda hit pagbuleg ha ira para makab-ot it kamurayawan ha syudad, salit damo nga mga social services ngan program an gin-iimplementar na han LGU nga pwede duukan ug matagamtaman nira ha yana.
Bisita liwat hi Ruthelma S. Samonte, Provincial Director han DTI Eastern Samar ngan Christopher C. Zamora, Acting TESDA Specialist II, TESDA Eastern Samar.
#BoronganonDisiplinadoAko
