Ginbuhat an usa nga Micro-Enterprise Development Training nga gindumara ha San Mateo, kakulop nga adlaw, Lunes, Agosto 8.
An nasabi nga nga paghag-id in katikangan pala han tama nga proseso para magin membro hin usa nga asosasyon.
Duha nga grupo an pinartisipar nga magigin benepesyaryo han Brgy. San Mateo, ini an Rice and Corn Group ngan Women’s Association, may-ada 47 nga membros, ngan magtutunga han Php 300,000 grant tikang ha goberno, diin an nasabi nga barangay in usa han siyam (9) nga nakada ha ilarom han programa nga End Local Communist & Arm Conflict o ELCAC ha syudad.
“Usa kamo ha conflict vulnerable areas nga kun diin an programa han goberno in nakapokus manggud ha iyo, asay an Executive Order No.70 nagkamay-ada convergence strategy nga naghahatag ayuda, nalusad an programa para han katawhan,” sumala kan Jazmin Odyssa B. Lutao, Project Development Officer II, Sustainable Livelihood Program, EO 70 Special Project, Region VIII.
Dugang pa ni Lutao, an nasabi nga kantidad in responsabilidad han kada grupo, dire ini baraydan, pero mayda hine mga proseso ngan monitoring kun nagin maupay ba an padalagan hini, an importante nga panuyo in masustenaran an programa, dumukwag ngan makilala an barangay pinaage han proyekto.
An Rice and Corn Group nga may-ada 29 nga membro in nagkaurusa nga magtutukod hira hin ‘Hog Fattening Livelihood Project’, an Women’s Association naman nga may ada 18 nga membro hine in magkakamay-ada ‘Bakery’.
Labot la han Brgy. San Mateo, nagdumara liwat hin parehas nga aktibidad an Brgy. Canyupay, Banuyo ngan San Gabriel diin hira an siyahan nga target hini nga programa.
An mga tinaglawas naman han DTI, DAR, Philippine Army ngan LGU-Borongan sugad han City Social Welfare Development Office, City Cooperative Office ngan City Information Office in kaupod daman nga tinambong han nasabi nga paghag-id.
