An LGU-Borongan in nakiki-usa pagselebrar han 4th National Disability Prevention and Rehabilitation (NPDR) Week, salit an syudad in nagdudumara tinikangan yana nga adlaw, Hulyo 25 ngada ika-29, hin mga aktibidades paghatag importansya han persons with disabilities (PWDs) nga Boronganon.
Gintikangan hin motorcade ngan haliputay nga programa an nasabi nga nga akibidad.
“Katuyu-anan hine nga NDPR Week nga matagan panahon an mga PWDs nga dire natatagan hin importansya, kay kadak-an an natutukan la an mga magkusog nga grupo o organisasyon, nalilikatan kamo an iyo grupo. Ini in para makahatag awareness hit iba nga mga tawo, iba nga ahensya ngan goberno nga mabati ug hibaruan an iyo mga issues ngan mga problema nga iyo inaabat,” mensahe ni Verena Amoyo, CSWD Officer.
Sumala naman kan SPM Lyra Gel Limbauan, Chairman, Committee on Social Services, posible na mahi-implementar an binulan nga P250 Cash-Aid Assistance para PWDs target antes mahuman an tu-eg 2022, ginhuhulat nala an pag-aprubar han ordinansa ha Sangguniang Panlungsod.
Nagpasalamat naman kan City Mayor Jose Ivan Dayan Agda hi Jim Cabunducan, bisita tikang DPWH ngan anay PWD President han syudad, ha pagsuporta ngan madagmit nga baton ngadto han pagpahimo han opisina para PWDs ngan iba pa nga kinahanglanon hini.
Salit, ha pagkayana in mayda na lugaring nga opisina han Persons with Disability Actions Officer o PDAO nga diin pinangungunahan ini ni Mrs. Marilu Villanueva.
Naghatag hin intermission number an mga pili nga kabataan nga PWDs, kun diin ira ipinakita an ira mga talento. Antes mahuman an programa nagkamayda pa hin “Balloon Raising” han tanan nga inatender, pasasalamat tikang han PWDs ha ngatanan nga mga bulig han goberno ug iba nga stakeholders han syudad ngada ha ira.
Presente pa han nasabi nga aktibidad hira Juvette Ganaba, ESDPES SPED Teacher ngan Marina M. Estrada, ESNCHS SPED Teacher.
