Gin tagan hin “Certificate of Completion” an Borongan City Library han National Library of the Philippines (NLP) niyan han Enero 31, 2022 para han ira manilampuson nga pagkompleto han Monthly Reports para ha mga bulan han Enero ngada ka Disyembre 2021.
Sumala han kasuratan han NLP, an mga reports nga inihatag han Borongan City Library in nagpadali han proseso pagkolekta han datus hiunong hiton progreso kanan han tanan nga public libraries ha nasud.
“These reports greatly eased our process of data collection and helped us generate the progress of all the public libraries in the country,” subay han NLP.
Dara hine nga reports nga igin sumiter han mga public libraries, nakapagtala hin sumatutal 9,464,563 nga aktibo nga public library users ha bug-os nga Pilipinas han tuig 2021 bisan kun may presensiya pa han makamaratay nga kagaw ug COVID-19.
Sumala kan City Librarian Teresita Catudio Ibao, dako an bulig han Borongan City Public Library labi na ha mga reviewees tikang ha Eastern Samar State University (ESSU) dire la ha kakomportable han lugar, kundi pati liwat an mga abilable nga mga teknolohiya para mapadali an pag-aram.
“Kadak-an mga reviewees la from ESSU, nagamit hira ngadi han amon Technology for Education equipment kay at least ngadi, conducive para mag-aram… It amon masisiring la nga bisan kun pandemic kita, pwede kita maghatag hin online services pinaagi han aton mga equipment,” subay ni Ibao.
Dugang ni Ibao, ha 28 ka-tuig nga iya pagiging librarian, dire niya gin ekspektar ine nga Certificate of Completion. Hingyap niya nga magdamo pa iton gumamit han public library para magpadayon pa nga mag-aram an kabataan o bisan hin-o nga karuyag makatagamtam hin bag-o nga kinaadman.
An panhatag hin award ug pagkilala in ginbubuhat kada tuig han NLP para ha mga public libraries, kun diin ginsu-sumiter iton mga reports hiton aktibo nga public library users ha usa nga syudad para ha usa katu-ig.
Dako an pasasalamat ni Ibao han padayon nga pagsuporta han LGU Borongan hine nga public library nga tulo ka dekada na nagse-serbisyo han mga residente han syudad.
Mahinunuduman nga nakakarawat liwat an Borongan City Public Library han Top Diligent Affiliated Public Libraries 2021 niyan han ika 17 han Enero tikang han Public Libraries Division of the National Library of the Philippines.
Para ha mga karuyag gumamit han Borongan City Public Library, ine in nahimumutang ha Borongan City Public Market Blg., 2nd floor, Poblacion H. Upod ha mga rekisitos an bisan ano nga ID ngan face mask para makasakob.
#BoronganonDisiplinadoAko
