Dire kaangayan an pautang nga puhunan ngadto ha 29 nga residente han brgy. Divinubo, nga nag papa-dako hin kabaktinan, sumala ine kan City Agriculturist, Macario Gabornes.
Sugad hine an kan Gabornes pahayag han pag-pakianhi ha iya nga kun kay ano, sugad an gin-pili nga proyekto han Dukwag Agrikultura didto nga dapit, kay pag-isdaan man an kasagaran nga pakabuhi han mga tawo?
“Iba la nga klase hin pag-uma an pagbaktiban, labot la ine han pag-isdaan o pagsa-tuna,” sering ni Gabornes.
Dugang pa ni niya nga, sugad man daman an gin-hingyap han mga tawo didto han isla nga barangay, tungod kay dire ha ngatanan nga oras, maupay an panahon han panagat.
“Danay nagwawalo-walo it dagat ha lawod tungod hin bagyo, ngan imposibli an pagsakay ha dagat para mangisda,” sering pa ni Gabornes.
“Labot pa, damo nga mga “ginang tagbalay“ an naruyag hine nga pakabuhi agud man hira makabulig han ira kaasaw-an nga mga dagatero,” dugang pa ni Gabornes.
Dire daw daman kabarak-an an katalwasan han kapaligiran kay upod ine han igin-pahamtang ha mga benepisyaryo nga impormasyon, an pag-ataman han kalibungan, antis pa hira nakatagamtam han proyekto.
Ha lain nga pahayag, nagsering gihapon hi City Veterinarian, Doctor John Adrian Ang, nga ginpa-planohan mahi-tindog in usa nga “Breeding Center”, ha Divinubo o ha Ando island komo kabatunan ngan pagprotehir han sakit han baktin nga danay tigda la nahinganganhi dapit ha probinsya, gintatawag ine nga African Swine Fever (ASF).
“Komo nahi-mumulag han syudad nga barangay, nga dire dali-dali ma-aalakbatan han sakit nga ASF an irihawon nga mga baktin, asya unta ine it plano, nga magka may-ada lugar o Breeding Center hin mga hayopan nga baktin, basi mayda la gihapon makukuhaan han talwas han ASF nga irihawon nga baktin, pananglitan man la, magka problema an mga pagbaktinan nga negosyo ha sentro han syudad,” sering pa ni Ang.
Ine nga plano in Igka-klaro pa han mga opisyales han City LGU.
Ha pagka-yana, abre an opisina ni Dr. Ang hin mga aplikante hin pag-utang hin igpupuhunan hin pag-baktinan, importante la sering niya, igsiguro nga an ira plano nga tangkal han baktin, in harayo hit kabablayan.
Ginsasagda ni Dr. Ang an mga interesado nga humuram han waray interes, waray inaaro nga “collateral” nga pautang hin puhunan, nga makipagkita ha iya ha ira opisina ha Brgy. Pepilitan nga dapit.
#DukwagAgrikultura
