Nagpapadayon la gihapon an pag-patuman han “Libre Medisina” nga programa han City LGU ha pag-abre han bag-o tuig 2022.
Duha han nakatagamtam hine nga serbisyo, in nagpapa-salamat hin dako han bulig nga nahi-hahatag hine nga programa.
Usa hi Sherwin Aquino, 46 an pangidaron, ug Rommel Apura, 37, pareho hira mga Boronganon nga nag-iistar, mismo ha syudad han Borongan.
Sering nira, dako gud an nahibubulig hine nga ira natatagam-taman nga libre nga medisina, ha ira adlaw-adlaw nga pag-mantiner.
“Dako nga ‘savings’ ine sugad ha ak nga mayda na ‘maintenance’ meds nga kinahanglan tumaron kada adlaw,” sering ni Aquino.
Dugang pa niya nga hadto, napalit la hiya ha mga pribado nga botika nga naabot hin usa ka yukot ka pesos an iya nagagasto ha kada bulan nga iya turumaron, kundi yana, nakukuha na niya ine nga mga medisina hin libre ha City Pharmarcy.
Hi Apura naman in nagsering nga, maupay nga bulig an libre medisina urog na ha mga kablas nga nagkukulang ha pinansyal nga aspeto.
“Maupay an bulig hine nga programa sugad ha amon nga danay dire maaram kon hain makuha hin iparalit hin medisina, labi na kun emergency,” pulong ni Apura.
Dugang pa ni Apura nga ha “Libre Medisina” nga programa niya, una nakuha an iya medisina nga pan- mantenir ngan, pinaagi hine, naibanan an kabug-aton han iya naga-gasto, tikang abrehan an “Libre Medisina” nga program han Borongan City Pharmacy.
“Mahipapalit ko na hin iba nga higamit ha balay an anay ipinapalit ko hin medisina,” sering pa ni Apura.
Hingyap han duha, nga magpadayon an programa ha siyudad ngan mas damo pa an mahibaro hine nga programa ngan mas humaluag pa daw unta an serbisyo han programa ngan dumamo pa an maka-tagamtam han libre nga medisina, labi na an makuri pag-bilngon ug limitado la.
Pipira han mga abelable nga medisina ha City Pharmacy in an mga medisina para ha allergies, highblood, antibiotics, mga vitamins, medisina para ha asthma, medisina ha batok, ngan damo pa nga iba.
Upod an mga rekesitos para maging benepisyaryo han Libre Medisina Program an tinuod nga reseta nga pirmado hin usa nga Doktor han City Health Office kaupod na an Voter’s ID, o Sertipikasyon tikang ha City Comelec.
An Libre Medisina in usa nga flagship program ni City Mayor Dayan Agda kaupod an bug-os nga Sangguniang Panlungsod ng Borongan ha pangunguna ni VM Emman Tiu Sonco.
Ha pagkayana, por lomenus, duha na ka yukot nga Boronganon an naka-benipisyo han “Libre Medisina” nga programa, han yana la nga bulan han Enero, tuig 2022.
#LibreMedisina #direktangayuda
