Gintikangan yana nga adlaw (Nobyembre 22) an serye han Pediatric Vaccination, ha Eastern Samar Provincial Hospital (ESPH) para han nag-e edad 12-17.
Sumala kan Mrs. Imelda D. Glino, Chief Nurse han nasabi nga hospital, 540 an nabakunahan han 800 nga target yana la nga adlaw.
Nagsering pa hi Mrs. Glino nga kinakarawat liwat nira in mga barakunahan nga mga taga Borongan sugad man hin mga nag tikang ha iba nga mga munisipyo han probinsya han Eastern Samar.
Dugang pa niya, nga kun pananglitan kulangon an 800 nga bakuna, waray daw gud problema kay may-ada man reserba nga bakuna para han iba pa nga mga interesado bakunahan.
Siring pa ni Glino, prayoridad an mayda mga sakit nga kabataan o may-ada “co-morbidities”, magkikinahanglan hira hin Medical Certificate tikang hin lisensyado nga doctor, nga ira ipapakita ha vaccination teams. Magkikinahanglan gihapon hira han ira birth certificate, Valid I.D. han bata ngan kag-anak, ngan mapirma han sinusugad nga “parent consent form.”
Nakarawat daman hira han waray mga sakit nga kabataan (without co-morbidities), nga magkikinahanglan la hin “birth certificate” han bata, Valid ID han kag-anak ngan bata, ngan “Barangay Certification”, pagkapamatood nga guardian hira han bata.
Usa hi Mika Capito, 14 anyos, taga Brgy. Taboc, hine nga syudad in nagpabakuna. Siring ni Capito nagpabakuna hiya kay karuyag na niya makaatender hit tipadaraon nga “face-to-face classes” ngan para han proteksyon han ira bug-os nga pamilya. Duha daw gud hira ngan han iya bugto an nagpabakuna nga 12 anyos an pangidaron.
Nabaruan naman nga an nasabi nga panbakuna in magpapasige ngada December 1, dungan han kanan kabug-usan nga nasud panbakuna o National Vaccination Drive nga pagtitikangan hit Nobyembre 29, ngadto Disyembre 1.
#BoronganonDisiplinadoAko
