Gindumara ha di pala maiha an ikatulo nga Pre-registration Seminar, ha panalugon nga mga barangay han Pinanag-an ngan Benowangan nga pinangunahan han “team” ni Mr. Jojito Acla, City Cooperative Officer ngan Lloyd Padilla, Cooperative Development Specialist han Eastern Samar.
Panuyo han nasabi nga paghag-id, an paghatag hin impormasyon ha mga nag-atender han mga kaupayan han pagtukod hin usa nga kooperatiba, mga giya han pagtukod hine, sugad man han mga responsabilidad han nga opisyales ngan membros, ngan an mga angay buhaton o ginawian han kada membro.
Labot pa, igintotdo gihap an iba-iba nga klase hin kooperatiba ngan mga rekisitos para makarehistro ha Cooperative Development Authority o CDA.
Sumala kan Acla, kun magin kooperatiba na an anay mga organisasyon o asosasyon hira in mahi-rerehistro na ha CDA.
“Kay kun kooperatiba na kamo, dako it oportunidad kun mayda mga hinabang, “grants” tikang ha National Office, ngan madali la it pagkokontak, ngan usa pa karuyag namon nga magkaurusa kamo”, dugang pa ni Acla.
Isinunod naman an eleksyon o pagpili han mga opisyales han kada asosasyon ngan sinundan han paghurar han mga bag-o nga opisyales han: “Bagong Barrio Women’s”, “Bagong Barrio Farmers”, “Pinanag-an Women’s”, “Pinanag-an Farmers”, “Benowangan Women’s”, ngan “Benowangan Farmers”.
Nabaruan dida han “open forum”, in pira nga mga kadaan nga mga ginawian han mga membro hin asosasyon, nga kasagaran nagigin hinungdan han paglaprak hin pira nga organisasyon.
Dagmit naman ine ginbaton han team nga nagsering, asya balitaw nga nagkadto hira han barangay, basi ipabati ngan tagan an mga membros hin mga ideya, hibabroan ug mga paagi han pagtukod hin mabinungahon nga kooperatiba.
Ha di pala maiha, kinadto han Acla Team an Barangay Cabong ngan Sabang North han parehas nga Pre-registration Seminar.
#BoronganonDisiplinadoAko
